西藏遊記之十：人間地獄外的月影繁星

6月13日的半夜四點幾五點，昨晚剛剛到步既時候咪話食左唔知係乜既「垃雜野」，後來發現原本包括：牛奶、酥油茶、怪味蛋炒飯同埋一d唔知係乜既菜．．．半夜終於發作了．．．（早知就食杯麵！）

一直唔想講西藏的洗手間，因為阿里路上十個有九個洗手間都係人間地獄，而珠峰這個嘛．．．１８層裡的第１０層吧．．．迫於無奈要去做大．．．不過半夜乜都見唔到，關閉嗅覺就無問題架喇（自己安慰自己），正想行出房去，哇！個天呀！真正的滿天星斗！開頭以為係日出，點解咁光既？原來係月亮既光照入我間房！

個月亮已經唔係全月，得一半，已經好光好光，我一直站在外面，連好鬼凍同埋件「大事」爭ｄ都忘記得一乾二淨．．．總之超級開心到爆炸！其實我整日身體都好唔舒服，眼既舊患、高山反應令個人好頹（加上四周不斷有ｄ其他人既高山反應呻吟聲），不過見到ｄ星星咁漫天飛舞，即刻精神一振！如果唔係咁凍我可以帶個睡袋“訓”係門外成晚，一定超爽！

返房再“訓”兩個鐘頭，七點正，我和小張醒了，起唔起身好？出面個天朦朦朧朧，繼續“訓”啦不如．．．之後Fanny又黎拍門問出唔出去，我又在重覆：「個天朦朦朧朧，又凍，繼續“訓”啦不如，等小黃叫我地先啦．．．」如是者無理會照“訓”，殊不知１５分鐘後小黃衝入黎撞門，我重想“訓”多１５分鐘喎．．．他二話不說，將我床頭的窗拉開簾打開窗，嘩！第二件驚嘆既事呀！珠峰日出來了！

即刻後悔之前無衝出出面影相呀！不過我部傻仔機又影到乜丫，之後晒Meji D相咪得！即刻「短打」唔理淨係褸返Gore-Tex算，衝呀！大家都出晒去，o個班中央氣象局、北京大學的朋友、外語人個個話我地好彩，Very Lucky，Very Lucky咁話，因為我地一來到山頂就睇到日出！（圖為無房住要紮營的朋友，絨布寺旁）

開心之餘就係影相、影相！

之後返入個暖d既地方食早餐是也，蛋煎餅．．．個樣同埋Size（８件）跟Pizza一樣咁滯！以為一人食半個，點知係一人一個，哈，結果食唔晒之後要帶埋上車！

食完早餐，其中一位司機黃師傅同我地一齊去Base Camp One，其實可以行2小時過去，但結果都係坐翻Jeep喇．．．都未回復昨天的體力．．．

去到HBC 1（Himalaya Base Camp One），鬼影都無一隻，除左因為並不是上山季節，另外就係真係要上峰頂既人最少都會係HBC2/3先紮營，或者會o係尼泊爾個邊上，比較容易D，印度就最難同埋Support最唔夠。

我地在HBC 1影相、影相再影相，

不得不提昨晚同我同房的除了小張，還有一位大師！佢昨晚高山反應就最強烈，呻吟聲不絕！但睡醒之後則精神飽滿！佢一早起身走路到Camp One已經厲害，其實佢一路以來重勁，我形容區為苦行僧，佢冰天雪地但衣衫單薄到不得了，行李接近無，但卻健步如飛！

去到Camp One同我地相遇，我地話要合照，佢即刻拎件「戰衣」出黎．．．

件袈裟就係呢個時候用架喇！原來呢位僧人來自廣州既龍華寺（定係乜華寺．．．）佢係由山腳既定日行到來珠峰，用左三日三夜．．．所以唔怪得知佢唔舒服啦！但係佢既精神真係無得頂！我地互相道別之後，坐車回招待所，收拾行裝，同珠峰Say Goodbye！我地由原路落返山，昨天預到的河床問題的路仍然有事，條橋重係修緊！今日就要有拖拉機拖我地過返兩條河，尚算順利，去返之前睇群山既加措拉山眺望台仍然大霧，乜都睇唔到！

Anyway，繼續上路，終於我們到了－－－老定日！