熹熹識佐D咩呢?

1歲零8日嘅熹熹又學識佐D咩呢?

學識佐自己坐廁板便便,自己坐餐椅食果果,放手企&行..

自己坐廁板便便：話說有一日,同D媽咪傾開計先知道原來其中一位媽咪已經成功幫囡囡練習到自己坐廁板便便喇!!所以上兩星期媽咪亦的起心肝去搵一隻有手柄的小朋友廁板返黎俾熹熹練習下..係屋企附近嘅家品屋搵過,只有一間有得買,但又覺得太貴$1XX..所以無買到..不過媽咪唔肯罷休,上星期返婆婆果邊時,又去家品屋睇下有無得買喇,點知俾媽咪搵到呀,價錢都合理,只係$7X..平成半呀,好彩上次無買咋..之後返到屋企就拎黎俾熹熹試,第一次熹熹有點抗拒,坐落去就彈返起身,第二日媽咪又再俾熹熹試,咦?今日熹熹好叻bor..肯乖乖坐係度喇,不過係俾廁所嘅地拖吸引住..但都好過距唔肯坐呀!!可惜距今次只係玩,無成功如廁呀!!第三日再試,今日距更加乖乖呀,成功如廁喇!!直至到宜家,熹熹每日都可以成功如廁喇!!叻叻呀!!

自己坐餐椅食果果：因為一直都好為食嘅熹熹,每次見到有野食就好似要搶食咁,而有時食緊粥距又會心急到搶我地手上嘅匙黎自己食,所以前幾日媽咪決定去買隻餐碟俾熹熹自己食果果呀!!熹熹見到可以俾距自己拎匙食梗係好開心喇!!仲將碟入面嘅果果攪黎攪去添..不過就要食好耐,餐後又要抺身抺手..

放手企&行：一直都唔敢放膽去放手企&行嘅熹熹尋日突然好叻叻呀!!話說尋日我地一家過爺爺度探大伯娘&BB,兼食姜醋呀(講起姜醋,仲係坐月時食過喇!!)過到黎可能熹熹見哥哥姐姐成日走黎走去,加上爺爺同三伯爺每次見到熹熹都要教熹熹行的,所以無那那熹熹連企都未識就識得行幾步喇,之後仲可以放手企2X秒呀,我地不停同距練,距真係OK呀!!見到真係好驚喜呀,估唔到熹熹咁快可以行出第一步呀!!

好開心呀!!每日見到熹熹慢慢學識一D野,感覺好驚喜呢..

熹熹,黎緊媽咪將會見到你學識更多的野,開心之餘亦會擔心的更多,因為你每學識一樣野,就會增加一個危險..不過你放心,媽咪會睇實你的..讓你的傷害減到最低..

注:長篇大論,希望大家唔好睇到眼訓喇!!