兩歲喇

細細話咁快就兩歲喇..唔好話由BB仔到1歲既變化差好遠..睇返D相..原來一歲到兩歲都差好遠..但我發覺有好多細細既發展都已經唔記得咗..

睇吓第13個月先..果時都係無乜頭髮..呢幅係去日本果時影..

第14個月..見到D毛仔好好笑..

第15個月..過年偷糖食...哈哈..

第16個月..呢幅相好似大個咗D咁..

第17個月..終於識行喇..雖然差唔多係頭一兩個BB識爬先..但就最後一個識行..由9個月爬到17個月呀..爬咁鬼耐既..哈哈..不過佢開始好肯自己做自己野..又肯幫手攞野..

第18個月..勁鍾意係車頭玩..仲要係司機位..玩到唔肯走..呢個月開始頭髮多少少喇..

第19個月..今年落水好似驚過上年咁..我估佢開始識驚喇..知道咩叫危險..但今年主要比佢係大人池玩..佢隻腳掂唔到地..好驚囉....

呢個月99開始幫細細戒片片..佢好快就明白無著片片就唔可以隨意all..基本上佢一唔著片就知道咩事咁..所以都戒得好快..日頭都唔幫佢著片片lu...佢唔講野..但就會禁住下面話你知佢要all all..有時佢都肯叫all 屎既..

第20個月..又係咩都要自己試..人地幫佢探熱.佢又要自己再玩過..

第21個月..第一次去沙灘..好鬼熱..曬到燶咗..第一次去行沙就好驚..喊晒..見大浪又好驚..之後慢慢先習慣

第22個月..好鍾意幫爸爸礳咖啡豆..其實係鍾意玩..

呢個月開始多咗野講..我唔係指BB話..係跟大人講野..但都係講單字..仲要唔係識講好多..

第23個月..第二次出國..去咗曼谷..都係咩都唔食..仲要食太空食物..但好好彩佢肯食包包同好like食生果..

開始又講多咗野..好似肯講婆婆同ee..嫲嫲..姑姑..都開始肯講..有時又肯講apple呢d名詞..有時又會講吓purple.green.red..同埋終於講自己名..但都唔係全名喎..全名都係唔識講..幾多歲又唔識..淨係講個2字..唔係2呀..係兩歲呀..

兩歲喇...比阿媽剪咗個好肉酸既頭.事關阿媽真係唔太識剪..阿媽係咁剪到佢短一短..著果件校服相又笑到好似賣牙膏廣告咁...哈哈..都係遲d等d頭髮長少少再影過..但老師話要貼一張著咗校服既相係手冊到...點算好呢..

生日果日買咗個蛋糕比佢..佢就開心啦..收到衫衫同單車做禮物..我地未唱生日歌又未影相佢就係咁開始食出面d古古力碎..激c...佢呢排好like食甜野..我都開始怕佢會砫牙..所以買咗d可以吞既牙膏幫佢刷..但教佢吐佢又好快學識..教一次兩次都學會..所以都無乜吞牙膏...話晒佢都有16隻牙..又早出過人..我睇書話bb通常係兩歲半前會出齊20隻..咁細細最後果4隻又唔知會幾時出呢..

過咗兩歲之後細細好似大得快咗咁..只係呢幾日..佢又講多咗幾個字..有時又會跟你講一句..好似禽晚我同爸爸講野....細細竟然重覆我既說話..雖然只係簡單幾個字..但我地聽到都好神奇..因為佢之前好少跟人講...同埋而家又開始應人..雖然唔係好識講..但都起碼會答你..係..唔係..有..無....以前只係識得我地返屋企攞拖鞋比我地著..而家出街時心急佢仲會攞埋出街鞋比你.趕你出門口帶佢出去..

呢一兩日開始搶電話聽..有次好好笑..我地知道個電話係果d做問卷既電話..就叫佢聽..佢拎起..喂...無喎....媽媽.無喎..跟住bb話..又話byebye咁.收咗線..真係好好笑..不過而家知道佢會聽得明有時我打返屋企都會同佢講一兩句..有次爸爸打返屋企..佢叫咗聲爸爸之後爸爸叫佢比電話我聽佢都識比...算係咁啦..

呢排佢好鍾意玩引體上升..總知佢可以雙手渣到既野..佢就會引體上升..唔好睇佢細細粒好易蝦咁呀..呢個人仔d手力真係好大..唔可以睇小架..哈哈哈..