浮氣疑惑

睇日劇成為咗我近排每日嘅指定動作.

雖然一路以來都在追日劇. 台劇韓劇中國劇唔會睇, 港劇好少睇, 所以我幾乎唯一睇嘅劇就只有日劇. 好好彩最近年每一季都有d自己鍾意嘅, 追得下去嘅. 今年都睇咗一堆, 但係其實多數都無印象. 秋季日劇已經準備出動(有幾套已經出咗!), 夏季劇我開始睇咗好多套, 但係追到尾嘅好似只有兩套...!! 瀧澤秀明+錦戶亮嘅雙頭犬令好多人好大期待, 我都以為會好好睇, 但係睇到第三集都開始想瞓 吸血鬼男孩睇睇下又好鬼悶... 女僕刑警更加係... 夏季劇睇得完嘅果兩套就係零秒出手同救命病棟4. 好多謝零秒出手令我鍾意咗做山下智久個妹嘅大政絢!

因為鍾意咗大政絢, 所以走咗去睇我的帥管家(メイちゃんの執事)同埋之前download咗但係無睇嘅太陽與海的教室... 睇我的帥管家都仲ok, 點知一睇太陽與海的教室就出咗事...

事源係我睇太陽與海的教室除咗睇北乃きい同大政絢之外, 我發現咗一個坐角落頭, 長頭髮幾可愛嘅女仔. 個角色名叫船木真由. 佢又好棧鬼架喎, 上堂成日瞓覺, 仲要戴埋眼罩架喎! 又成日講外星人呀UFO呀咁. 一個非常不可思議嘅小妹妹. 就係咁, 我就發現自己不知不覺間對佢有咗興趣... 通常我都係咁, 睇劇好多時候都係要睇人. 因為鍾意一個演員而睇一套劇, 响果個劇入面又揀另一個鍾意嘅演員(有可能揀唔到架喎), 再去搵果個新演員嘅劇黎睇... 咁先可以做到長睇長有嘅效果!! 咁我照我嘅一貫作風, 响太陽與海入面揀咗呢個女仔, 諗住睇完太陽與海就到睇佢d劇... 殊不知這個原來有一切煩惱嘅開始!! 原因係, 呢個女仔除咗係演員之外, 仲有一個身份...

唉~ 其實見佢果時都覺得佢熟口熟面架啦... 但係一時又諗唔到响邊度見過佢喎. 睇咗幾集太陽與海的教室, check到佢叫前田敦子. 見到個名, 更加覺得熟... 究意响邊得見過呢...? 係啦係啦!! 當年睇成海璃子套未來之我的製作法就見過佢啦!! 咪係當年短頭髮幾可愛果個靚妹吖嘛! 無見一年(太陽與海的教室係2008年夏季日劇)大個咗好多喎~! 突然之間我又諗啦... 咦, 既然當時我已經覺得佢咁cute, 點解我無搵佢其他野黎睇架呢? 因為我好明顯已經忘記咗呢個人. 如果當時我有搵佢其實劇or戲黎睇, 我無可能會唔記得佢. 奇怪啦~ 非常唔似我個人嘅作風...

為咗知道真相, 我決定起佢底... 一响wiki度search, 我已經即時知道點解我當年無理佢啦...

原來佢係AKB48嘅成員!!!!!

AKB48係最近冒起嘅女子軍團. 由於同Hello! Project嘅體制極度相似, 所以被認為係Hello! Project嘅最強對手. 係Hello! Project嘅公敵... 我自己以往都幾小心, 避開佢地以免中招. 所以我推斷當年我睇完未來之我的製作法之後, 發現咗佢係AKB48, 所以立即收線. 我自己知自己事... 對可愛嘅人極度無抵抗力嘅我如果再見佢多d一定會中招, 所以自己斷咗條路先... 點知... 點知佢咁次竟然再次出現!! 仲要我係睇咗好多集太陽與海先發現佢係AKB48... 心知都不妙架啦... 到睇太陽與海第6集(feature佢果集), 我睇到喊就知道我中咗招啦!

以下就係佢响太陽與海入面個傻look... 人地啱啱瞓醒咋~ 哈

掙扎咗幾日之後, 我決定放棄抵抗... 算吧, 反正我一早已經話咗我唔係Hello! Project嘅fans架啦, 我只係鍾意愛妹一個... 咁AKB48係唔係Hello! Project嘅公敵都唔關我事架啦? 啱啱果個weekend呢, 我研究咗前田敦子同AKB48好多野... 日後會寫編篇研究報告.

以上.