十七小時 之 咖啡走甜丫唔該~~

又嚟十七小時啦~~

今次吸收左上次嘅經驗，又再嚟過。

但白吐絲實在好悶，好就整咖啡味啦~~

白老鼠鍾意飲咖啡，包包消路應該唔會太差。

今次本想減水份，但我真係攪唔清材料當中咩屬於水份(佔包包嘅60%之多)，蛋? 蜜糖? 所以都唔知點入手減好。最終用足全份量，又係用S勾幫手，不過今次出奇地好攪。加埋牛油，用S勾都可以攪到光身又唔黏手。我係咁以用手搓左5分鐘就已經可以拉都薄膜~~耶~~跟住落嚟嘅程序都算流利。當包包入左爐，正打算沖杯蜜糖水潤下喉　先發覺頭先無落蜜糖丫~~(都成4%架)。唔知係咪咁嘅原因，包包變相減左水，所以咁好搓。

出爐敲下包底，今次有“空洞聲”呀~~耶~~

撕開仲有一絲絲丫~~~真係興奮!

再用刀切開嚟睇睇，今次明顯比上次白吐絲好。

墜底情況明顯改善，因為我今次只放室溫發酵。

另今次在包模內搽上牛油攞色，包包果然一身健康膚色。

(其實唔知關唔關咖啡本身色水事?)

焗咖啡包包時，確是滿室啡香~~不過原來食落無咩味架咋喎~~

搽鹽牛油或鍊奶一流~~