老豆牛一 @ 鹿鳴春

今年老豆牛一細妹唔在港，所以大前晚一家提早為老豆慶祝。

因為細妹想食北京填鴨，我又好想食雞煲翅，一於鎖定目標鹿鳴春去也~~(點解好似同細妹&自己慶祝多啲)

之前都報導過我個crazy lunch，今次都係我第二次嚟鹿鳴春食晚飯咋。記得上次食已經係四五年前嘅事。當時十幾廿人，唔知係咪唔識點菜，印象當晚唔係咁回味。不過事隔咁多年，期間都聽過唔少人講佢地個翅正。今晚幫老豆慶祝，就食豪啲啦~五人狂左吞八人餐。

餐前小食，無記錯食晏時段嘅花生係烚花生。但係晚上點解換左咸脆嘅~~我鍾意烚花生多啲喎。至於酸菜一樣咁正。

先嚟返個拌盤先~~有我至愛嘅煙薰素鵝~~不得不提係呢到嘅素鵝好有煙薰味~~正!!至於其餘兩款配菜都不過不失，如果個“象根”可以雪凍啲仲正~~

話明攪生日緊係要beer beer 佢啦~~(搵值口啫)

嘩~~我好期待嘅雞煲翅丫~~勁呀~~

呢窩翅到底有幾多?!我地五個人，平均每人飲左三個飯碗有多丫~~~

↓留意下圖左上角~~~有隻為食貓申晒脷

就連隻雞啲肉都好嫩~~

你睇有幾多翅~~絕對唔係粉絲嚟架~~

我絕對唔係食翅專家，所以唔好問我啲翅靚唔靚，不過我只知好好味~~痾耳屎~~~

呢兩舊嘜家火~~原來係饅頭~~唔知係咪京菜style呢~圓姑碌~成個山東大包咁~~咩味?!我唔知丫~~因我留肚食其他野，所以無試到。

再嚟就係清炒蝦仁，油油地。不過不失~~唔知點解差不多每一次我食同類型嘅炒蝦仁就會諗起上海正中嘅河蝦~~細仔好多~不過好食好多架~~唔知香港邊樹有真真正正嘅河蝦食呢~~

北菇扒西蘭花~菇菇都好厚身，但大家都係留肚食鴨。食左細半碟就叫火計幫我地打包先。

戲玉嚟啦~~~~填鴨登場~~

老媽同細妹二口同聲，大讚好食過北京果間老店“全X德”。

食到呢度大家無九成都有八成飽嘞~~

但仲有條椒鹽桂魚未食~~唔得~~點都要試啲架啦~~

內好厚~~不過都算有肉汁，絕對唔會炸到過乾身。

再加埋個疑似中式茄汁一齊食~~正~~

我鍾意食骨，主攻魚頭同尾~~同老媽爭食~~

再嚟一籠蒸素餃~~得架~~皮都算薄。咁多隻當然食唔晒啦~~淨返嘅都成左我第二朝嘅早餐。

最後緊係要嚟晒個甜品，呢餐飯先算做完全架~~本身個餐跟高力豆沙，但老豆同細妹都係拔絲香蕉嘅粉絲。我地就要求換，佢地又樂意安排喎~~仲要係唔洗加錢。

味道都唔錯，不過拔絲啲絲就欠奉~~相信都係傳菜其間香蕉放涼左啲咁多啦~~拔絲香蕉要做得好就係要親香蕉面啲麥牙糖仲係勁熱時，即入冰水。不過無啦~~總算係咁。

今餐飯真真正正嘅又食又叻~~老媽仲話第二晚可以煮少餐飯。

在此祝老豆身體健康、聽教聽話(亞媽話)

後記：睇返啲相先發覺我叫呢個餐叫〝鮑翅填鴨餐〞~~咁講唔係應該希鮑魚咩~~唔通佢個包係指成舊大包咁樣嘅饅頭~~