師姐妹聯誼大會

上文提到我相約左陳C9同師妹嚟我家玩整餅。

今次大家目標有六行之多~~

先嚟陳C9 request 嘅班蘭戚風蛋糕。呢個亦係我近排比較整得多嘅一款蛋糕。綜合左幾個食譜，我終於搵到一個又濕潤、又Q嘅蛋糕~~就連我自己都叫捧!!

斑蘭戚風入左爐，陳C9一邊洗碗一邊“露”聞~~勁讚班蘭好香~~

整得班蘭味多我搵嚟一個突破~~櫻花紅豆味戚風。順便可以清一清我之前買落又唔知點用嘅日本鹽漬櫻花~~

呢個味道好特別，唔係好識形容。櫻花有少少酸同咸嘅感覺，但當食到自家製紅豆蓉時就有少少甜，不過紅豆味亦唔會太搶。師妹就勁鍾意呢個蛋糕嘞~~可能配埋宇治綠茶仲正!!

另一款兩女工指定project係十七小時黑白芝麻包。計埋今次呢個包已經係我第四次整同款包。皆因佢確實好好味~~麵糰剛好要分三舊搓，我地三人都有機會落手做~~大家又認唔認得邊舊係自己嘅呢?!

今次係我整左咁多次包包組織最滿意嘅一次~~可能真係熟能生巧~~

不過我同師妹都懷疑大家撈亂左個包包~~無理由我卷包包手功仲差過師妹架~~

↓呢個係我即場切嘅~~

↓呢個係師妹攞返屋企先切嘅~~

今次師妹嚟最想整果醬~~數數手指~~我上次整果醬已經係524卜聚時。之後都無再整過。今次encore我至愛紅酒梨，加陳C9強烈推介嘅藍莓香蕉。全程由師妹實習~~一煮就係七樽之多。兩女工試完紅酒梨都大讚~~師妹仲話佢以前一直對紅酒煮梨呢個甜品有啲保留。無諗過咁夾。佢仲話有機會一定要試試呢味法式甜品。不過記得帶埋我去丫~~

最後到左我最期待嘅時刻~~~

大家估唔估到呢PAT係咩呢~~~~heheh~~~就係至邪惡嘅榴槤也!!

聯誼會前我發現左一個極之吸引嘅食譜--班蘭榴槤糯米糍，再暗查暗訪發現三位女工都係“識食”之人。所以一於買起一隻金枕頭，發陽光大去~(實質係發嗅多啲~~~)。

↓先蒸熟個班蘭椰汁糯米皮，再預備埋自家製奶黃。大家帶齊手套~~開功!!

你睇~~~醬爆榴槤丫~~~

最終我地發現陳C9有好強嘅包糯米糍天份。再加埋佢完美主意嘅精神~~

登登登登~~~好似出面賣嘅一樣~~

不知不覺~~時間飛逝~~我地由三點幾開波~~差不多九點幾先完結。師妹可能少郁動，就連食晚飯氣力都無。最後只好我兩C9仔去元氣刷大餐。好耐無咁痛快地食食食啦~~~~耶!!

今日師妹好有心，整左兩款曲奇作拌手禮。師妹真抵錫~~兩款都係我至愛~~~分別有燕麥提子軟曲奇，同送咖啡一流嘅Biscotti。

\