媽媽的擔憂暫緩....

有啲貓友可能知道，茶茶喺大概兩個月前發現有尿道炎。無經驗嘅Daddy & Mammy 都唔知原來尿道炎可以致命咁嚴重。好彩發現得早，立即帶佢睇醫生，病情先至得以暫緩。不過好景不常，茶茶喺食緊藥嘅期間尿尿一齊正常，但一停藥又去唔到廁所嘞。爹媽只好再跑去診所攞第二隻抗生素(當中診所不專業嘅回覆及時間上嘅管理都免得再提)，最終食完第二個療情。尿尿問題終於解決，不過除之而嚟就係嚴重軟便問題。媽咪起初都有比之前仔仔食過嘅腸道supplement佢，但都幫不上忙。最後得到Kathy好心送出家中存貨，來自台灣嘅益多多。茶茶起初試食時便便完全無好轉，但就當媽媽週圍幫仔仔搵好醫生，再約到一星期後應診時。個衰仔便便終於好返。(真係比個衰仔玩死)不過媽媽諗咁難得搵到個好醫生，就帶隻衰豬去攞個second opinion啦。

琴日就係見醫生嘅日子，醫生好nice。問完一輪仔仔之前嘅病況，就幫茶茶體檢一番。而醫生仲好詳細解釋尿道炎嘅成因比媽咪知：-

1) 長期只食乾糧

2) 吸收水份不足

3) 遺傳

4) 細菌感染

5) 未知因素等~~ (其實仲有幾點，不過媽媽唔記得啦~~)

而媽媽最想知現時應從邊一方面入手幫茶茶，以防再返發。醫生最終建議先從密集式驗尿尿入手。先不用改變貓地日常生活，每兩星期帶尿尿樣本比醫生驗。期間醫生會教導媽咪從仔仔飲食、日常生活習慣等方面作出適當調適，為求令茶茶尿尿以下三方面達到理想指標。

1) PH 值

2) 是否有晶體

3) 尿尿濃度

雖然好似好煩瑣，又好似醫生想搵錢。但如果可以帶比仔仔一個更健康嘅生活，煩啲又有咩問題呢。媽咪唔想到左無得醫嘅地步作後悔。話說琴日去睇醫生有一對夫婦帶住一隻十二歲嘅大狗狗嚟，嘩!!狗狗右身肚腩位有一舊藍球大嘅肉肉凸出。雖然媽媽不董狗狗，但都心知不妙。等嘅期間聽到另一狗主人問起狗狗病況。原來狗狗爹媽由肉肉好似網球時已發現，但見狗狗日常飲食同走動都無咩異樣。所以一直無上心。但今日睇完醫生，醫生話而家可以做嘅已經唔係太多。唉~~早啲幫佢救診可能仲有得醫。