2008 Week 11 and RIMM Race

2008 Week 11 and RIMM Race

第十一週，全力休息準備RIMM，作為告別賽，勁希望喺精英組攞到Place啦！但係左腳踝仍然腫及痛，真煩！  訓練只有脚踏機、強化四頭練習，總之避免傷及左腳踝！而拍檔程偉亦已準備就緒，幫我完成心願，認真唔話得。

RIMM RACE 20080315-16

星期六，一早到河背村登記，始知精英組得四隊，但隊隊堅挺：Elton & Hoi To; WONG Wai-kin & Philis; Stone （小強)& Ka Wai! 只計速度，我最多贏Philis，或Elton! 點都好，一定係硬仗，攞苦嚟辛

吹完一輪水，起步啦！Checkpoint 如下：

1.河背水塘迴旋處

2.山火瞭望台

3.甲龍

4.大刀刃

5.雞公嶺

6.逢吉鄉

7.南邊圍公厠

8.髻山

9.BBQ Site (Camp Site)

由起點至甲龍，我哋四隊都緊貼，正正反影小強不熟地圖的弱點，事関佢跑得好快，但往往遲到Checkpoint。去到大刀刃，我哋力保第三，慢Elton/ Wai-kin數分鐘，而小強己失去聯絡！

我見Elton/ Wai-kin穿入一個林落大刀刃，心想最好搏一搏，選擇另一條遠D但清晰嘅路落山，不成功，便.....

一路上雞公，都見唔到佢哋，諗住冇死啦！佢哋可能出唔到林...哈！但去到雞公，原來佢哋己過了分鐘啦，當堂謝晒！卒之去到Campsite，慢了卅分鐘，小強亦慢我卅分鐘！

星期日，一早起身，食碗薯蓉後就搭車去黃金海岸附近之起步點，CHECKPOINT如下：

10.白石坑路口;

11.圓敦；

12.三角標高點 (。226)；

13.上塘路口；

14.石龍拱；

15.田夫仔；

16.吉慶橋；

17.大棠學校(Finish)

第二日嘅路程一D挑戰性都冇，大部份時間跑石屎路，小強照常好快，我哋三隊就拍住，去到POINT 12，已唔知小强去咗邊！到石龍拱，confirm 我哋仍然亞三，䏲落Elton 同 阿建唔會出錯，而我嘅左腳踝亦已腫過豬頭同好痛，於是keep 住咁返終點。最愚蠢嘅事亦同時發生，我哋放低咗支水，諗住冇咁辛苦，最終要飲咗一D後備水，但都係好少....衝終點，第三，Check Kit，佢哋要將D水倒出嚟量，我玩咗咁多年未試過，而且我個水袋重有Marker添，卒之一度，欠三、四支益力多，話要加4小時，喊無謂！

而我嘅山霸旅程，由2000年Men's Open冠軍，跟住經歷數次冠亞季軍，到最後呢次精英組嘅慘痛失敗，都係時候劃上句號！其實當中有個情意結係未能解開，就係2001年第二屆，我哋第一日head 住 Elton/和仔20分鐘，到第二日，我哋都一直帶住，臨到最後一個CHECKPOINT西貢獅地，因心雄關係，唔想比ELTON 貼住返，大意入錯路口，卒之遲了一小時先返到大灘終點，冠變季！！

個次之後，我個拍檔膝頭要做手術，跟住幾屆換了幾次拍檔，唔係受傷退出，就係屈居ELTON 之後，一直未能贏佢，後來佢去邀請組/ 精英組，我先贏返！今次我特地請程偉幫手出山，希望可以贏到 ELTON，但係自己已經唔係九年前既我，始終係走緊下坡，而佢就越操越 FIT，老實說，今次能夠拍住佢走大部份路段，而亦贏到小強/ 家偉個 TEAM第三，都算對自己有個交代。只係對程偉唔係幾好意思，有辱佢身份！

山霸之後，相信只會玩埋 ＷＩＬＳＯＮ　同　ＴＲＡＩＬＷＡＬＫＥＲ，跟住就要做好　希望之友　既工作，幫內地窮苦小孩起學校同酬款，嘗試下另一方面既發展。屋企亦係一個重要原因；而訓練及比賽會放下一會，睇下到時有幾多時間凈！

好啦，再見山霸！