奶奶大壽

昨天奶奶擺大壽，雖然話擺大壽，但都只係屋企一齊食餐飯。因為淨係屋企人都坐咗 3 圍，而且奶奶唔想老公同大哥使咁多錢。

我地一早己經入咗沙田 (夜晚食飯都係沙田第一城)，因為大哥想同堅仔買玩具，就約我地下午係沙田市中心飲茶。但我同老公都唔想俾堅仔有一個錯覺“大伯 = 買玩具”，所以飲完茶我地提意去公園玩，等堅仔有得走動吓，又可以同其他小朋友一齊玩。

下午 4 點我地就去到酒樓，間酒樓都唔錯呀俾咗間大房我地，開咗兩圍15人枱另加三枱麻雀，都重有好多空間俾小朋友走來走去，就算舅父同阿姨到齊都重有位行來行去。

奶奶因為有客要到鋪頭攞貨，所以 6 點幾先到。佢一來就馬上同堅仔去買玩具，係一隻大飛機，重識行同埋有音樂，堅仔都好鐘意，係咁指住架起飛機話“嘩”，叫我地睇吓幾厲害。

大約 8 點幾就開席，老公都係係咁義食咗少少野就同大哥去同舅父 social，大嫂重攞埋佢 D 珍藏紅酒出來，大家都係咁追酒飲，又不停問大哥邊隻酒靚，隻酒邊度出，同之前飲緊o固 D 有乜分別，個個都飲到紅噗噗好開心。