煙肉蛋麵包杯 (附食譜)

原來我好耐無 Post 過早餐喇, 咁今日就介紹一個幾得意既早餐食譜俾大家啦! 

呢個食譜係我偶然睇一個外國網站見到既, 做法同之前整既 幸福多士 感覺差唔多!  平日朝早時間會比較趕, 所以整既食物都以簡單方便為主...... 通常不外乎係煎隻蛋, 焗件多士咁啦! 其實只要花多少少心思, 呢個日常早餐都可以變得好有新意架!

✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿

煙肉蛋麵包杯 (食譜來源 : 吉斯蒂的幸福廚房)

材料 :-

煙肉 2片, 雞蛋 2隻, 白麵包(去皮) 2塊, 牛油適量

做法 :-

1. 白麵包以麵粉捧輕輕壓至扁平(不要壓得過薄,否則麵包會容易爛), 用刀在四邊角位向內界開 (如圖所示,留番少少唔好切斷), 然後在其中一面塗上牛油備用

2. 準備 Muffin 模或圓形焗杯, 把麵包以重疊方式放入模內 (塗有牛油的一面做底), 再放上 1片煙肉, 最後打入雞蛋

3. 放入已預熱的焗爐內, 以 200度焗 12-15分鐘即成

備註 :-

1. 通常我會選用煙脊肉, 因為無咁肥膩; 唔想用煙肉的話, 改用火腿都一樣 OK!

2. 底部塗上牛油, 除了防黏之外, 仲會令麵包杯焗起時帶有金黃色的效果 

3. 吉斯蒂焗的是半熟蛋, 少少糖心, 蛋黃略帶流動的程度; 如果要食全熟蛋的話, 繼續焗多 3-5分鐘便可  (*注意 : 每個焗爐火力不一, 請按情況自行調節)

✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿   ❀   ✿

相同的食物, 只要花多幾分鐘時間, 就可以做出唔同的效果.....

為沉悶的工作日帶來新鮮感!   大家不妨試下!