自製美食

又到學期尾，結業禮當日除左按學生成績頒發各個獎項外，對呢班小朋友而言，結業茶會比獎項更為重要。

所謂結業茶會，其實都係食 d 普通食物，例如魚蛋、三文治、啫喱、薯片、朱古力豆、曲奇餅等等。於大人而言，對呢 d 食物完全提唔起興趣；但小朋友眼中，呢 d 就係人間美食。(我唸如果爸爸媽媽知道交幾十蚊茶會費就係食呢 d 食物的話，一定覺得好唔抵啫。)

到咗夜晚既畢業聚餐，只係邀請畢業生參加，而聚餐既食物，都係由老師們 DIY，我地 team 人就唸左整奇趣飛魚餅同特色 sushi 卷...yummy!

----奇趣飛魚餅----

材料：加拿餅、罐裝吞拿魚、粟米粒、沙律醬、朱古力豆。

做法：將吞拿魚加入沙律醬拌勻，然後搽喺加拿餅上，再將粟米粒同朱古力豆加上面。

感想：呢款絶對係簡單易做既食物，啱晒我呢 d 唔識整野食既人，初時無唸住加朱古力豆，只加粟米粒喺面就算。但出黎既效果唔好，太單調，所以即刻去買朱古力豆鋪面，效果好好多。食既時候，要先食粒朱古力豆，然後再食餅；如果一齊放入口，味道會又甜又鹹有 d 古怪。

----特色 sushi 卷----

材料：麵包、紫菜、罐裝吞拿魚、粟米粒、沙律醬、牙簽。

做法：先將吞拿魚、粟米粒、沙律醬一起拌勻，然後塗喺去皮麵包上，再將麵包捲起，用刀一開為二，最後外裹紫菜並用牙簽串起。

感想：材料與奇趣飛魚餅相若，但口感很不同，紫菜、麵包同粟米吞拿魚醬好配合，賣相與味道都好滿意。

除左呢兩款食物外，果晚仲有沙律、白汁蝴蝶粉、米通、雞翼、炸雲吞等等特色食物，比起朝早既茶會，真係豐富好多。

聚餐食物主要用嚟招呼畢業生，我地班老師都只係食少少頂住肚先，等聚餐完至去搵野食醫肚。

今次我地去赤川日本料理，呢間料理開左未夠一年，之前都食過幾次，環境靚，地方大；不過食物質素麻麻地，每次都係貪佢近屋企至會去食，但今次 order 呢兩款食物又好 ok 喎，所以要分享一下。

----五色刺身----

有蝦、帶子、北寄貝、三文魚、劍魚腩，全部都係我至愛，好鮮甜，好味道!

----燒魷魚筒----

好夠味，又唔會靱，如果再熱番 d 就更好味。

呢度環境都幾 ok 架，坐得都舒服。

返到屋企，即刻試下新買既香水，我一直都想搵一支爽身粉味既香水，但聞過好多牌子都唔似，呢次 sales 介紹左呢個牌子俾我，佢話冇 sample 所以無得聞，但就拍晒心口話呢隻係爽身粉味，信佢既就買啦。我都係第一次聞都唔聞下就去買支香水咋...但...佢咁肯定就信佢一次啦!

返到屋企即刻開黎聞下，又真係爽身粉味喎，好彩無買錯啫。另外買左支 summer 版既 burberry，都好香架，可惜係男裝我無份用 lu!