飛記茶檔

應大佬基推介，今日去了旺角登打士街砵蘭街交界的飛記茶檔試食。入到去，亞姐侍應 (全部中年亞姐無後生) 已隨手打開兩個餐牌俾我睇，雖然已經係三點，除了下午茶外，仍有午市飯供應，因為這個時候較餓，所以點了飯餐，好多選擇，最後揀了白汁牛俐飯，奉送白湯，凍奶茶。食物方面無太多野可以講，只能講唔錯，穩打穩紮，但凍奶茶我覺得只屬一般，加上今次只食了一樣野，不能作準。

來之前大佬基話呢度 up dup，我又唔覺，而且冷氣充足，食完後更可睇下電視，唔會急住走，但如大佬基及譚生所言，望望佢餐牌的選擇及餐具的擺放，確係好有餐廳 feel，可能真係平價扮高檔餐廳，若以這個白汁牛利飯來計，以 $32 有埋湯同飲品，而質素又不俗的話，確係比去那些 "高檔" 餐廳俾六七十蚊再加一食同樣既野好，而同區有部份茶餐廳有同類餐食，都可能要四十蚊，而服務可能比這裡差得遠，又多契弟，所以以今日的經驗，飛記茶檔絕對去得過 !

環境：3
食物：4
衛生：4
服務：4
抵食：5
整體：4

(5 分滿分)