輝記海鮮酒家@馬灣

其實輝記我食過好多次了, 今次有帶相機, 先有機會寫下食評. 佢既魚,海鮮類價錢, 個人覺得比較貴, 但就斤兩十足同埋係上好的料. 所以如果要食海鮮, 就唔好就住就住食啦.

今次無食海鮮, 只係和朋友家常便飯. 叫了以下菜式. 佢地既水準保持得好好, 即係話上次食過的, 今次食唔會太走樣, 如果上次覺得好味, 今次都係咁好味.

佢地個餐牌

椒鹽鮮魷拼九肚魚 – 炸得剛剛好, 唔太油, 爽口.

蝦醬通菜 - 蝦醬味足.

孜然吋骨 – 呢個一定要試下, 不過好唔好味就見人見智, 不過大部分人都話唔錯. 我就覺得都幾好.

蕃茄胡椒牛腩煲 – 又係一定要試, 夠惹味, 佢係用清湯腩, 估唔到用蕃茄配胡椒都咁正, 又可以當湯飲. 牛腩都好易入口, 夠淋.

風沙雞 – 又係佢地出名的菜式, 似炸子雞, 皮夠脆,肉夠滑.

東瓜盅 – 湯味比較清淡, 材料有些小不足.

馬灣蝦羔炒飯 – 味道十足的炒飯, 份量足夠.

豉椒炒蜆 – 呢個就普通左小小.

蜜椒牛柳粒 – 又係佢名菜, 有蜜糖味, 又有胡椒味, 都幾特別.

因為佢坐落係村屋關係, 環境就真係麻麻啦, 衞生方面如果做好 d 就好了. 是次無食海鮮, 所以價錢唔貴, 平均每人 HK$70 左右.

如果去得馬灣, 就真係要試下啦.