2008關西(大阪+京都) 熱辣辣,行跛脚, 夏之旅 (Day 3-Part 1)

第三天: 2008年6月29日, 大阪: 天陰間中有大雨

行程: 姬路城, 神戶北野異人館, 神戶港, 神戶Mosac, 飛苑神戶牛晚飯

今日因為要去多個景點, 所以要早d出門. 其實有時都真係覺得旅行仲要勤力過返工, 早出晚歸之餘仲行到脚跛. 但係當然辛苦得嚟又特别開心啦.

首先第一站係日本國寶及世界遣產之一嘅姬路城.  先由地下铁御堂筋線難波站搭去梅田站,然後行過隔離JR大阪站坐東海道山陽本線新快速去姬路@1450yen, 約61 mins.

今日天氣不大好, 出咗姬路站後, 大約要行約15-20分鐘至到姬路城, 中間一直落雨, 仲越落越大添.  好彩尋日係大阪城天守閣外面買咗把300円“係日本人都有嘅透明雨傘”, 呢幾日睇嚟都大有用處!!

之前喺網上睇到話: “姬路城係江戶時代嘅建築, 由於地理位置嘅關係, 在漫長的歷史歲月中, 奇蹟般地幸免於戰火和火災的危害, 現為日本僅存的4座城堡之一得以完整地保存下來.” 比較大阪城天守閣與姬路城, 我個人較鍾意姬路城, 主要因為佢比較像一座城堡, 有自給自足的設備, 而圍繞佢周圍嘅建設同亭園都保持得很好, 哈哈, 覺得抵睇d嘛.

入去姖路城嘅主城樓參觀時要除鞋換室內拖鞋, 然後就自己挽著對鞋參觀.

參觀完姬路城後已經係中午, 又落大雨, 我地避咗一陣雨買咗小小手信後, 又出發去下一個景點 - 神戶北野異人館.

首先搭番JR去三ノ宮站附近食午餐先, 因為我都好鍾意食日本嘅咖哩蛋包飯, 所以一見到有得食就二話不說衝入去間餐店整個嘆下先.

仲有好好味嘅日式咖哩豬扒飯

食完後就喺附近發現City Loop Bus站, 心諗, “嘩, 有無咁好彩呀, 唔駛點揾就係隔離?” 好彩車又未嚟再睇清楚個地圖先, 原來係去相反方向!  之後行返過去JR三ノ宮站口嘅City Loop Bus站搭車去"北野異人館"站. 

呢個至係啱嘅.

到北野異人館站落車後, 有d惘惘然唔知點行, 唯有跟人行啦.  經過有風見雞之館, 萌黃之館, 英國館和荷蘭館等等, 因為之前睇書話要比錢參觀, 而館內多數是懷舊的歐式家居佈置, 所以都無諗住入去, 只係喺外面影下相啦.

風見雞之館

萌黃之館

英國館

荷蘭館

旅遊書介紹附近一間"六甲牧場"小店嘅牛奶雪糕, 好好味.

另外又買咗人氣土產店風見雞本舖嘅芝士蛋糕. Yummy.