Prelude to Act II: My Retirement a.k.a. Mein Teil

大家都知父親節係每年六月第三個星期日，不過遲左半個月先正式慶祝，冇辦法，開舖太忙，特別禮拜六日同假期更加走唔開，今日七一紅假，仲可以咁悠閒同家人食飯，全因我已罷脫羈絆。

「由即日2009.7.1起，劉Sir正式自TRHK門市部退休。」

幾個月前已經講過會走。不過又要搞show，而且TRHK門市部近四年基本上劉Sir獨力支撐，一走自然牽連甚廣，要到今日先正式安頓好可以離開。決定離開遠因近因眾多，而家日頭份工開始忙，多野做左又成日要出街、上大陸，耗費太多時間精神，前排家父對眼有事入過院做手術，已過退休年紀又已經第三次入院，絕非好徵兆。而且睇舖、搞show、寫作太多工作在手相當疲憊。既日頭份工忙屋企又多事，倒不如留番多點私人時間俾自己。

而最大原因，唔難估到：面對香港metal，劉Sir（終於都）對到化了。基本上TRHK 2002年九龍城龍珠開張開始，我已經係接近日日蒲頭常客，唔使好耐做埋職員，讀書兼職三年後，單人匹馬坐旺角皆旺舖唔覺唔覺都四年，見證住香港聽metal、玩metal、搞metal一班知識態度變遷。自最初起已經覺得自己好離群，因為我有四樣野唔做：我唔download、我唔夾band、我唔係專家唔玩填字遊戲、我唔搞是非只做音樂。再者經過多年洗禮，其中一樣「專業技能」，係單從一個人言行舉止表情動作，就可得知佢「level去到邊」。當如此真正投身音樂時，就會發現本地metal存在好多幻影。

經常提出：香港metal K歌化。metal從來屬於地下音樂，但黎到香港只成另一種潮流產物，CRADLE OF FILTH、CHILDREN OF BODOM同各大metalcore樂隊成為J-Rock同Manson潮退後下幾浪，以前metal仲未有好多人聽碟唔易買網上面冇乜人講時，聽大名好正常，但大多人會肯接受唔同類別肯試地下樂隊，但而家連四大唱片公司都做metal，所謂「地下音樂」商業程度根本已同流行音樂同級，新加入一班第一日上forum十分鐘已經成為專家，一面倒只聽出名大band同多人講堆band，香港人對metal之追求，已達前所未有咁K。

hip-hop同R&B等今期流行，好比metalcore同其他當打潮metal style；

四大及遭其收購之獨立廠牌，好比英皇等K歌大生產商；

大label千金所谷搞到好似不聽不可之metalcore及其他各類型樂隊，好比TWINS同容祖兒之類當紅歌手；

只聽而家最紅果幾種野幾隊band，好比只聽而家大公司plug上台幾首K歌；

紅緊潮緊先聽其他野輕則忽視重則無理抨擊，好比聽K歌唔願接受其他音樂如英文歌死話自己追個歌手最好；

99%音樂屬download餘下1%俾錢買都只屬大公司出名band，好比妹妹仔fans download幾首派台K歌就夠特別版靚先買埋隻碟；

搵到隊band聽完首歌上forum話俾人聽玩填字遊戲滿足自己，好比聽完一首K歌同成班friend上K房唱表演娛賓滿足自己；

對聽到之音樂可以不需理解亦無心研究同人講得到「我識我聽過」就夠，好比一眾靚仔靚妹唔會留心創作人心思只要入到K房識得唱萬事足；

forum見到其他人唔係聽同一樣野或唔識就窒人串人笑人，好比Sina論壇等一非支持自己偶像即人身攻擊之妹妹仔fans行為；

當一隊band冇人講立即唔聽甚至踩多幾腳再追另一水，好比一首K歌唱夠聽夠就話佢「out啦」而改追新一期plug台歌；

上網兜幾轉，就知現今香港絕大部份聲稱聽metal者，音樂態度同接受認知與上面比喻不差幾樣，而我不得不承認，我真係唔識得應付呢種「Metal K歌迷」。最起碼，我唔識點樣將一種文化藝術，當成一種商品推俾客人。失敗在，我做唔出其他本地成功metal銷售者所做：9up當秘笈，如當年信和長毛，幫襯過都知其實佢介紹一隻碟十樣野有六七樣錯，但即使唔知乜野黎大家照買，因為大家唔係要聽佢介紹，甚至唔係為聽音樂，而只係要聽佢實牙實齒一句、聽完覺得自己買左立即「升呢」威過人即刻乖乖俾錢之一句：

「正到lum樓喎呢隻而家個個都聽乜你仲唔買咁失敗？」

但升左呢，識多左野（卦），心態又如何？老實講，你點都估唔到，一場陳慧琳演唱會話晒俾你聽，香港聽K歌一班可以比聽metal果班「更metal」。最少，妹妹仔fans為左自己鍾意位偶像，可以瘋狂燒錢同投入時間去追去支持，但網上見到好多香港metal友，「我聽underground music架」，不過「好多野要買呀」，「搞到冇晒錢買碟添」，「得番錢買一隻，梗買名牌子啦」，「果隊band都唔識梗唔俾錢買啦！download聽咪得囉」，「聽過佢（一首）歌，就即係我支持左佢啦！」難怪多左咁多人（轉）聽metal，輕鬆得多又慳錢得多但當然型得多。

近年metal流通高峰期，係metalcore進入香港，亦即大唱片公司開始插手宣傳以前根本唔多理之metal開始，當大公司都宣傳，舖天蓋地之下，metal自然成為J-Rock後另一潮流指標，但metalcore缺乏內涵而短命，紅左年幾甚至一年都冇立即高速沒落時，網上講metal聲勢已嚴重不如前，局內人對metal熱情亦由火炬變成火柴，但未落得以前J-Rock甚至nu-metal下場，全因靠上網吊住條命：上網搵歌，有幾難？知道band名碟名，花兩三個字工夫已經download晒有得聽，要追潮流唔難，醒一級的勤上MySpace同YouTube搵獨立樂隊「分享」自製hype，一時間專家四起。感覺上擴闊左視野、接受力提昇、識多左好多（地下）樂隊，建立自信心後，離開電腦獨自去到一個新環境如TRHK，亦即面對真正試練時，到頭來反而失去上網練成之音樂批判能力，要聽可以、要買可以，但限於電腦中睇到聽過之樂隊同歌，跟住事態發展，返番去上一節Metal K歌化詳解已有分曉。偶或願意試聽，可能有聽過覺得好聽合適，但「唔會買」，因為當講到俾錢，都只肯奉獻俾大公司旗下出名band，或網上專家們吹捧之潮band。上forum搵band聽，十隊可以有八隊話好聽鍾意，但入到一間舖頭話「我要買碟」，對住過千隻碟卻可以睇極試極都話「冇一隻想買」，足以見證到香港人得把口本性，同音樂視野接受力之狹窄。

如果唔係而家網上咁容易免費得到資訊甚至完整作品，metalcore潮退後，基本上與時並進之香港人早已完全放棄左metal，只餘原來之死忠派繼續追隨，即與當年J-Rock一樣，而此種完全旨意網絡風者只會不斷增加，兩三年前大約只得一半，到今時接近全部皆是。免費媒體令聽及講metal人數增加，但從音樂角度睇，只是犧牲質以滿足量之退步，實質上香港人對音樂之接受力低到你唔信，並比已低之以前再低好多；首先，冇名氣、要俾錢？收皮吧。玩得好算得乜？獨立音樂同商業音樂不同之處，係後者只重搵錢質素可以不理，而前者調轉一切以音樂性及質素行先，著重名氣多於質素時，已經偏離左獨立音樂之態度，所以我會話metal香港進入香港後，只成為J-Rock沒落需人接棒而時勢造成之另一種潮流產物。

就同所有文化藝術一樣，當潮流主導所有事物飛快而過，再冇幾多人會留意內容。近年咁多人聽metal整個scene咁蓬勃（或稱曾經蓬勃過／睇落蓬勃），上網睇睇，填字遊戲多，真正討論音樂之話題接近零，即使有人帶出音樂性質問題（非問「有冇邊隊band」、「有乜好介紹」、「近排乜歌好聽」之類），大多數無人回覆，好彩的話有人插咀片面幾句，結果往往係參與者自己都「可能係」、「係噉卦」等不肯定立場，最後無結果下草草了事收場，即蓬勃者只限於表面，本質完全被忽略。有心人一直存在，不過比例上少得難以察覺，同最大問題當認真寫音樂時，放上網後獲無甚建樹地求祈回應幾句以示參與已算好，否則一係完全冇人理，一係俾人話「挑咪又係炒外國」，但有趣在本地forum成員好鍾意引用內地及台灣文章，反而本地人肯寫、寫得出時只受到排擠。難怪網上根本冇人講音樂只得分享，俾心機寫一篇文出黎俾人笑俾人串，同簡簡單單上MySpace搵隊band講幾句放條link即變人民英雄，你揀邊樣、邊樣容易持之以恆？敢講劉Sir係香港冇幾多個真正有心去寫去推廣metal之人，我已經幾年冇玩過forum，正因五六年前幾個本地主要forum中已經領教過好多，可能仲有人記得劉Sir係Gestapo時代迷你論壇不受歡迎人物之一，因為每每佢出聲之後，個主題就會冇晒人回覆極速沉底；又可能仲有人記得「每週一唱片大行動」，其他主題好多人話「想試XXX」，唯獨此主題回覆率近0%，每週更新後一兩日已經去到幾版之後，甚至俾forum版主洗埋。經過左五六年都係噉，根本冇改進過而只有更差，網上討論地區都冇討論，文化價值已不存在。

當音樂態度品牌化，香港人更無多少尊重音樂之意。潮流其中一個病態現象，係過時亦即上一水／上幾水，經常成為新一潮追隨者攻擊目標，metal在港咁潮相同現象自然在所難免，CHILDREN OF BODOM仍然橫行時期，已經有好多從J-Rock投身metal人士踩還是正在過氣之J-Rock以顯自己「識聽音樂」同緊貼時局，瞬間打倒昨日的我者不止於聽眾，更包括唔少轉型樂隊成員，而家上網咁多野download，潮流上落自然更快，跟住CoF同metalcore時勢，MYH3都有講過。香港現象就係咁古怪，就算本身自己聽開，當種音樂或樂隊一唔興、自己一唔聽，立即疏遠及彈至一文不值，直到再興起或自己再聽為止先至變番做「好野」，所以真正要做metal的話，香港絕對做唔到，潮流＝metal時，今期流行metalcore，metal就等於metalcore；近排網上多人講extreme metal，就只有extreme metal先至係metal。最後，無論各位大老細講到自己幾想搵冇人識的樂隊、幾想聽地下野都好，賣碟一班都只可以賣大label出名band，唔出名樂隊除非賤價否則冇人理，而開宗名義metal gig，若非做潮流show搵大band，就要搞hype show搵齊本地明星助陣，做不同類型樂隊同台之雜錦式metal gig，就如Tomahawk Metal Fest I後記所寫，只會俾人話你唔識野話你pop俾人笑俾人串。香港metal界之「地下」，早已同潮流無異，不過相信其中冇一個人知道，獨立音樂精神中包容及尊重之心相當重要。

以前曾經憧憬過，夾band一班層次會比一般人高，遺憾事實正好同所想相反。因夾band都係從某種類型或某隊band開始，好多樂隊中人 － 非話全部，只是大多 － 往後追求音樂時集中同一隊band及同一類別，偏差少少都唔可以，播歌佢聽的話，基本上只需要播番佢隊band玩緊果種就得，其他野你點播都唔會有反應，但同時間如果播緊隊band唔出名，點優秀、播幾多首歌，肯俾心機試聽一陣已經好好，更加唔使問會唔會買。聽得專／窄，卻未必一定理解內容，TRHK內外唔少機會遇上香港樂隊中人，有部份可以連自己玩緊種音樂係乜都未必講得清楚，最通常之解釋同形容係band名，但亦只有band名而難更深入，又因名氣觀念困身。經過咁多年比較band友同非band友，好遺憾後者大多 － 非話全部，只是大多 － 音樂視野比非前者更狹窄，亦更在乎樂隊名氣，尋常眼光當你做得樂隊成員，理應不止技術上還有內容上已清楚理解自己所屬之音樂，對音樂整體亦應抱相當開放態度，你問我點解本地現實會調番，唔夾band的我答你唔到。

或者只有又係果句：Metal K歌化。此現象不限於聽眾咁簡單，在夾band群體中發展得更加極端，上段提過之尊重與包裝更加完全消失。首當其衝係「pop野」，例如已被降格至比metalcore更低之power metal／一般清聲唱metal，常被踐踏得體無完膚，BlackWine 08年《影子》演唱會後記已有紀錄，當時遇到過一些本地extreme metal樂隊成員，對BlackWine團員及音樂之不可理喻負評，我都唔好意思寫出黎。而且你唔會明，點解咁多人一夾得band，特別紅左之後，氣焰可以咁高。好多香港band友經常人前要裝出一份「霸氣」，相反外國band去到環遊世界演出級數，冇幾多個會做到好勁好「霸」，反之平易近人甚至好有家教，同香港擺到個款生人勿近完全唔同。而且唔介意同人分享，睇番舊聞一則：新加坡樂隊OBLITERHATE自己叩門，憑誠意同才華打動多位世界級巨星為其首張專輯台前幕後相助，重點不在於搵到邊個幫手，而係幫佢果班全部名堂驚人，可以用自己名氣技術搵錢，偏偏肯唔收錢或超值價幫一個三唔識七路人甲做session搞錄音。但香港幾乎搵唔到呢種人。你試下搵一位香港band成員做同一樣野，請佢無條件幫手或有野請教，只被求祈敷衍打發走冇被挖苦，已經算你好彩。當外國band越來越冇「星味」之際，本地樂隊卻越來越rock star。

夾band最重要必數音樂，但連對音樂本身已唔多認真，其他方面再加惡化，可用理所當然去形容。Tomahawk Metal Fest I後記中都有提到，「講香港band壇最出名係是非而非成就，未必冇人唔認同，我非band壇中人，但接觸到香港band成員之機會唔係冇亦唔係少，而每每在TRHK以內遇到，或TRHK以外相見，香港band成員講得最多者，往往係其他band是非、『邊個乜乜乜』、『果個唔妥果個』之類，而絕少真正對自己band壇正面、有幫助的『分享』。」雖然我非樂隊一份子，但當連樂隊間都可以或明或暗彼此互相攻擊時，TRHK作為一間經營metal之所謂「商業機構」，同主要成員劉Sir乃全港唯一一人有知識講出此篇文所有觀點，唔使多少想像力都諗到咁多年黎TRHK會俾人講過幾多閒話。香港人有樣野好有趣：只要你辦藝術時牽涉到錢，就一定會話你係為搵錢為商業，但你肯睇真，全香港搞metal單位中，TRHK查實係最逆商業果個，真係冇心做音樂、真係咁（易）搵錢的話，我諗冇必要花十年時間七位數字業餘搞一間地下唱片公司出黎，搞亦唔會做metal整體，因為metal夾夾埋埋最少十幾種每種有各自市場，全部兼顧晒即如現在成本高過任何人估計，同時舖內有九成以上樂隊專輯根本唔需要入，因為香港根本唔會有人識有人試。為商業想賺錢的話，只需學習其他真正商業之大零售店，將規模縮減90%只賣大label樂隊同今期流行類型，時間及金錢投資可以大幅調低，同時真係搵到錢一年回到本之餘盈利絕對高而家十倍以上，兼可以成為正職生活落去唔使似而家咁多年都係日頭夜晚走兩頭，最重要能夠做埋英雄受萬人景仰，掌握潮流者即掌握人心。

噉點解咁多人會話TRHK商業？因為香港係一個古怪之社會，你要上位唔係靠實力，而係一將功成萬骨枯，靠踩人上，香港唯一一間打正旗號做metal之TRHK，自然成為大眾所需的踏腳石：樂迷／專家需要，因為自己「冇錢」（拎晒去玩去買其他野嘛），為自己下載之「反商業」行為合理化，同顯得自己聽緊地下音樂；樂隊需要，因為批評完人地商業，就可顯得自己非商業、反商業，對「地下樂隊」之形象、態度表面重要，更能為自己行事作一定掩飾；演出搞手同樣需要，鬧對方搞show「商業」例如早前之HIBRIA power metal得黎又唔出名，進而能話俾人聽自己「真係識搞show」、「先至係識搞show」。實際上？就如上面講過之K歌化現象，基本上而家整個香港metal界，下至匿埋屋企自己摷黎聽，中至無數網上專家，上至夾band者搞show者，無不聽歌取向以大廠牌主導，前提必須是出名或有hype，播真正冇人講冇人識之地下樂隊，不論質素一律唔入耳，而且一面鬧「商業」時（不止TRHK，還包括整個潮流），自己聽歌一樣只聽大廠出品、買碟只去大舖買，換言之身為地下音樂一份子甚至身為地下樂隊但唔支持、唔接納地下音樂，抨擊緊獨立唱片公司至整個潮流商業整個工業時卻只會俾錢真正商業經營擺明搵錢之大公司，根本不合邏輯充滿矛盾，常聽到香港metal友成日問「點解呢隊band咁正都冇人聽」、「點解聽垃圾中文歌都唔聽外國歌」、「英皇出極都係K歌點解仲要聽」之類，到頭來自己又何嘗唔係如聽中文歌一班，受制於大公司宣傳同網絡人言，並自己一手導致metal落得同一下場呢？另做gig搞手同夾band，除自己活動外，某程度上亦肩負作為榜樣之責任，但你睇到而家連搞show同夾band一班都係帶頭只聽hype band、上網講download問人send碟，呢種榜樣會啟發出乜野追隨者？再請睇番上面Metal K歌化。

所以成日聽到好多人鬧TRHK搵錢商業，鬧左咁多年，香港仍然只得一間metal label，如果真如對方提出搞underground metal盈利咁豐厚，點解冇人會出黎爭地盤分一杯羹，尤以香港人、香港metal界中人咁計較咁睇著數之態度？並非因為有原則，實則身處唔支持地下音樂之地下音樂群體中，自己知自己事。試問問有關人士一個月會買幾多隻碟、買碟佔每月消費比例多少、自己有幾多隻碟同有幾多激MP3、點解有錢時唔可以先貢獻俾音樂，有剩先買其他野而一定要調番轉有「閒錢」先買碟、買碟有幾多係大路band又有幾多係真正地下band出品？甚至去睇show時會唔會買表演樂隊專輯以示支持？只要一問一答完成，問答雙方 － 包括批評緊人「商業」者 － 都會立即明白點解TRHK根本冇可能係一間能夠商業之label，而只可能係香港metal界最唔商業、最indie單位。同可能要提提相關人士，BlackWine後記同樣帶出過，當年之「pop」如成了地底泥的power metal，在metalcore出現後早已失去其商業潛力，現今各大公司宣傳目標係metalcore及extreme metal，所以非清聲唱metal要比清聲唱類型具更高市場滲透性及更大佔有率，鬧人聽同鬧人賣「pop野」「商業音樂」時或應想想，會否其實自己先係聽緊「pop metal」？而被自己鬧緊果堆，其實早被逼迫回偏流反倒成了地下？

而在香港逢涉及利益者，定必引來大量（不必要／可避免）之爭執，所以label同樂隊及搞手之間出現（無謂之）衝突，的確在所難免。香港人早已默許左，一隊本地band只要能夠成功「為港爭光」，過程手段可以在所不計，即使作風就如佢地所抨擊之「商業」、「搵錢」都冇問題，而樂隊同非樂隊辦音樂最不同處，就係非樂隊者做音樂係推廣整體而非只個別一兩隊般造星，而樂隊往往覺得自己隊band成功出到名即等於推廣到所屬音樂。Tomahawk Metal Fest I後記甚至更早期黃家駒特輯都有提出過一條問題：當一隊樂隊成名，係自己種音樂入到屋，定自己隊band入到屋？成名後又會再做多少？樂隊一開始已從「我」出發，推動樂隊以外音樂之力度及幅度大受限制，尤其在現今樂迷視名氣高於一切之香港，可參考多年來多場演唱會，演出前夕至表演日大家氣氛高漲，但演出幾日後已無幾多人會再談論，從中受到啟發而真正開始研究音樂甚至開始夾band人數更是少不需數。長年累月以來，好多時包括局內人，經常話冇人做野，而我敢講TRHK屬於香港metal界少有真正出錢出力及有充裕知識推動音樂之單位，但當真係有人做野時會點？死。香港風氣就係灰在呢樣。冇人做時鬧冇人做，有人做時又唔滿意，我唔做係我事但我亦唔妥你會做，因為你做左我冇做，咪俾人覺得知我冇做到野？非常典型香港人思想。當自己匿埋一個玩唔做野又或根本冇心做時，就需要如前述之反派存在，做死左做野果個，餘下果班繼續唔多做野、繼續只顧谷自己時，自然天下太平。問我例？又係同一個，其實一個已經足夠解釋所有野。早前因「撞show」而起之一宗無無謂網上討論中劉Sir提出之事例，已可見不少端倪，而整個討論之起因，要追溯回《紙談音樂》第35期HIBRIA訪問，因為當中一個批判「為何多年來香港演出搞手未有為來港樂隊花過功夫介紹順道推廣音樂」案例，牽涉到本地另一主要metal gig主辦單位，有人感到冒犯，進而煞有介事以揭瘡疤方式回應。問心，我所寫全部反映現實，多年間的確冇幾多搞手請外國band黎香港時有落過特別心機，你帶隊band黎香港（理論上）係為推動音樂，但次次來去兩陣風過後無人費神回顧，並未有助於推動音樂同啟發觀眾。但文章落到個別人士眼中，閱後唔係思考番「有做過乜野／冇做過乜野」、「有乜野可以做／應該做」、「點解會冇做過」，而係「你串我丫拿好等我整死你睇你仲有冇聲出！」而此等思維及行動是出自本地「榜樣級」人士，可想而知整個metal界風氣如何，亦可話你聽，所見到只係七年黎多番折騰之一角，講埋其他你聽，我怕你同我一樣覺得香港metal文化低處未算低。其他人點講點評我懶理，反正而家我又唔屬於TRHK，簡單講多幾句已經夠晒。

「TRHK或劉Sir從未叫過任何人唔好參與其他單位主辦之演出，亦從未慫恿過任何人唔好支持其他本地音樂單位，亦從未向其他外國樂隊及外國廠牌講過任何本地樂隊或主辦單位壞話。我唔知TRHK以外其他人有幾多個夠膽講同一樣野。」

不過你對比都知，好多香港樂隊同搞手風生水起追隨者眾，但TRHK長期冷清加常被用作上台階，全因你唔跟大隊就係問題，你自己正直唔做小動作唔講人壞話其他人一樣會，你唔一齊做係你傻仔。此又乃一說明TRHK全不商業例證。其實綜合番長久以來所講之本地metal樂迷、metal band友行為及態度，凡事追求名牌名氣、死剩把口難見出手、講時大大聲要出錢時閃得最快、認為人地做野實有機心、自己冇心做野又唔妥其他人落力做野、唔用實力而靠偏門打擊其他人、面前笑騎騎背後放毒蛇．．．等等等等，耳熟能詳，咪就同大家返工所見之商業社會辦公室政治一樣？而香港metal界最諷刺亦係呢樣。獨立音樂之出現，正因這種種商業風氣令有才者未能得到盡情發揮，唯有獨立界不存在任何人事及政治元素，單以實力及才華定高下，先令音樂得以急速及茁壯發展，亦如08年初與一台灣行家所談中提出，你會選擇獨立音樂已不屬常情，不止音樂口味，更包括對音樂甚至對生活之態度，即真正為音樂，而非為名為利為威水為囡囡諸如此類。但好易睇到香港係調番轉，聽metal因為潮因為型，夾band更多為型為出名甚至為女fans，而當中最大諷刺，係已達「榜樣級」甚至本地領班級數人馬，行為同辦公室中同事甲乙丙冇分別，都係講多過做利益行先踩住其他人上實力其次，更因返工做又三十六唔做又三十六，但而家涉及自己「星途」，各種動作要比平時返工做得更落力，走精面行蠱惑永遠容易過暨成效大過有骨氣走正路嘛，人人噉做，就建立出一股鼓勵大家唔好靠實力而靠小動作之負面風氣。而人前人後兩個樣者，我都唔敢同你分享，有陣時從多方面得知一個人各面，你唔會相信眼前所見係同一人，正如試過一次有個band友呢頭講完「得架喇我實支持你地架」，轉過頭收到電話，聽到同一個人於另一地點講出完全相反說話。咁多年黎我都對到慣。好多香港metal友、band友成日高呼「我係獨立」、「我反商業」，但自己將商業社會生活一套搬落音樂營運再變本加厲，噉你玩音樂心態同你平日返工果陣有乜分別？乜會決心玩獨立音樂，唔係正正就係為反抗佢地追隨緊種商業社會風氣咩？只希望冇樂隊一面做時自己歌歌詞唱緊反商業社會，搞到口不對心。可能因為我冇夾band，所以完全投入唔到呢種名不符實之本地獨立音樂文化。我只覺得好虛偽。

從量計而家香港metal界一定好過以前，但論質的話，我睇實八年，現實一年比一年差，而家係差到好難再差之地步，所以我覺得留落去都冇意思，既然香港Metal K歌化同商業社會政治風氣在香港metal界已根深柢固至無可動移，根本冇可能改變到多少，不如抖抖做好日頭份工同多返屋企活回自己生活，最少，好多野我唔使咁心灰意冷先。

「提醒大家，劉Sir離開左，唔等同於TRHK執笠。TRHK及TMHK廠牌，仲有TRHK門市部全部照常營業。」

「但營業時間將有改變：現為星期一至五開5-9pm，星期三休息；星期六、日及公眾假期開4-9pm。」

「要見劉Sir唔係冇機會，例如黎緊星期六11/7蒲吧RUDRA演唱會，而TRHK從來人手短缺，有需要我都會客串番睇舖，有緣自會相見。」

「相信黎緊日子各大小band show特別metal show唔難見到劉Sir，四年黎日日朝九晚十，令我錯過好多gig，而家唔再只得星期三晚演唱會或自己單位主辦之演出先有機會睇。」

「以後有任何問題，你仍然可以繼續問劉Sir。其實而家科技咁發達，見唔見到真人又有乜分別丫。（可能見唔到仲好呢，呵呵～）」

劉Sir離開TRHK，對少部份人黎講係大事，因為共患難左七年，特別近四年劉Sir同TRHK根本已等同同一個體，佢走左可能代表TRHK皆旺舖唔捱得幾耐，同時亦有少部份人覺得當中存在「香港搞唔起metal」之象徵性意義。我未至於覺得去到「冇左劉Sir會唔掂」之地步，當事人我做左TRHK咁多年，走的話理應反應最大，都可以走得咁低調，即代表我已經完全唔在乎唔重視香港metal此所謂本地音樂界。我亦絕對認命，而家唔係一個有真材實料同時唔囂唔串唔拋書包人士同你分享音樂知識時代，上各大forum分享主題自己做埋專家一份才是皇道。我之前講過幾次，TRHK對我黎講只係個學術研究平台，俾到我地點同所需工具、場景去接觸甚至研究本地metal文化，就算TRHK唔止門市而成間label執左，對我都冇太大影響，可能更好，因為提供更多題材探討、同更少牽掛可以寫得更盡情，就如可能仲有人想知我幾時會寫之撞show事件。我諗而家回復完全自由身，時間更多限制更少，黎緊日子我可以從多個角度寫metal文化。好似我會再深入從社會學角度探討，點解在香港metal冇可能好似如其他（偏）獨立音樂般做得起做得大。另唔少樂迷眼中地位神聖之獨立廠牌SPV於2009年中破產，係近年metal界大事之一，台灣網界並因此引發一場小小風波，同樣我有興趣寫番篇文講講。當然咁大單新聞香港接近完全冇人理，更加唔會有乜風波搞到出黎，你問香港有幾多人識SPV？香港人從來只關心band名。其他名，不值一提。

基本上要講都講晒，真係想睇多少少，簡單整個「teaser」，剖析TRHK於大中華至亞洲區定位，帶出一個遺憾事實。

TRHK廠牌，多年努力間多年前已成為亞洲區著名indie metal label，但能於全亞洲闖出名堂，在香港只係負責俾人鬧「商業」藉以扶助自己上位之「賺錢機構」；

TRHK門市部，係外國網頁都會介紹之香港metal地標之一，存量之廣連歐洲客都要上黎搵番佢地自己國家都搵唔到之本地樂隊唱片，而外國雜誌編輯、唱片公司職員甚至內地權威級音樂雜誌《重型音樂》及《極端音樂》編輯，對門市部通通一致好評，因為「好多野唔識」而顯地下及多寶藏，更加視為中華地區最值得光顧金屬唱片舖，相反香港人從來只會對此店作出劣評，理由相同：「好多野唔識」；

不少TRHK網絡資源文獻及碟評，著者包括劉Sir及部份過往編輯，被其他地區如內地及台灣轉載，並獲認真對待獲高度評價，但相同文章從不會獲本地論壇轉載，即使登出如非遭冷淡回應（如有回應），就是獲嘲為「抄襲外國」；

香港metal友水平去到邊、同外國距離差幾遠，從中可見。特別係世人對TRHK之評價。咁多年接待過世界各地國家客人，未試過有一個外國人會話TRHK唔掂，更冇多少外國客入到黎會空手而回，而全世界唯有香港人會話TRHK「唔掂」、「廢」，見到幾千隻碟可以「都冇野買」、「冇野我要」，如此現象背後含意只有兩個可能性。第一個可能性係香港metal友水平已經超越國際，達全球最頂尖之列。唔使我講你都知冇可能。換言之只會係另一個可能性，即．．．．．

不妨自己思考。