與楠楠對話

楠楠同媽媽玩得好肉緊之際，忍唔住手搣媽媽塊面......

媽媽：「哎呀！好痛呀！唔準咁樣搣人面面呀！我搣番妳得唔得吖？」

楠楠：「唔好！唔好搣我！」

「咪係囉......」，媽媽覺得又係時候同楠楠講下做人嘅道理：「己所不欲，勿施於人吖嘛！即係解......」（下删數百字）

楠楠似懂非懂咁跟媽媽唸：「己所不欲，勿施於人。己所不欲，勿施於人。己所不欲，勿施於人......」

＊　＊　＊

第二日，表弟同姨媽（即係楠楠媽媽）玩得好肉緊之際，忍唔住手扯姨媽頭髮......

姨媽：「哎呀！好痛呀！唔準咁樣扯人頭髮呀！我扯番你得唔得吖？」但係其實表弟係剷青頭兼聽唔明姨媽講mud嘅......

姨媽轉移視線同楠楠講：「表弟係咪唔應該扯媽媽頭髮吖？噚日媽媽教過妳嗰句記唔記得呀？妳教埋表弟啦！」

楠楠好猶疑嘅表情：「噚日嗰句？......」

媽媽：「呢...... 我噚日教妳「己所不欲」跟住咩呀？」

楠楠好有信心咁大聲答我：「己所不欲，任施於人！」

「吓？！」