公主病

楠楠未夠年齡做「港女」，但係已經患咗「公主病」！

以前間唔中都有姨姨姐姐送同迪士尼公主有關嘅禮物比楠楠，佢都無表現出特別喜好。但係幾個星期前，楠楠突然冒出一句：「媽媽，我好鍾意公主，我想做公主啊！」自此，楠楠就患上「公主病」！

呢種「公主病」最明顯嘅病徵係企圖或意圖要身邊嘅物件都印有公主圖案，公主衫褲裙鞋襪最好樣樣俱全......　另一病徵係病情反覆、三心兩意，

今日話你知好鍾意阿 Belle　，

過兩日又變咗好鍾意 Ariel　，

病情唯一穩定嘅係，呢個小病人好確定自己唔鍾意 Jasmine　，唔鍾意佢頭頂插咗條毛喎！

可憐阿媽媽本身都有病，係「公主恐懼症」！要我帶個由頭到腳都著住公主 style 嘅人仔出街，諗起都打冷震！但係我呢個媽媽好有「職業道德」嘅，即係呢，好似阿金像影后鮑姐原來係唔食榴槤，但係為咗部戲都要去學開榴槤，仲要做到好好食咁樣嘅職業道德...... 所以，我都有買公主衫比楠楠，但係只限係屋企著囉......

楠楠噚日病情又嚴重咗呀！佢話：「媽媽，我想做公主，我想去迪士尼樂園喔！」唉！救命呀！