相處

星期六晚, 大頭蝦既大仔, 忘記要去睇一個中樂演奏會, for 做學校功課報告.

直到星六晚, 快到 9 點鐘時, 佢至醒起, 問我點算.

我叫佢拿拿聲趕去, 反正去文化中心, 只要 30 min. 仲睇到三份二 part

不過此時, 老公反對, 咁夜, 唔準大仔出去.

我亦覺得, 去唔到, 都有方法做到份報告, 所以我無異議.

但大仔跟住追入黎我間房, 閂埋門, beg 我出聲比佢去, 起碼去攞份場刊, 影 d 相至做到份功課. 要我幫佢出頭

呢 d 位係我最怕!  老公係個大男人, 一唔 arm 聽就嘈交, 處理得唔好, 仲會打埋個仔. 

唉...  考慮左一陣...嘈就嘈啦!!

於是叫大仔立即趕去; 中間你一言我一語, 搞到差不多9點8, 大仔至出到門口.

好彩大仔都仲睇到最後果part, 攞到場刊.   大仔11點3 返到黎, 可能覺得今次我幫左佢,

佢一直陪住我睇 youtube 貓貓 video, 直到12點幾至去訓.

                                                 *            *           *

到今朝 (星期日) 老公休息(罕有!).  問我地今日有咩做;

我話要同大仔買波鞋 & 校服, 唔arm 著咯~  

佢聽完, 就話一齊去買.  但去到波鞋舖, 大仔就古古怪怪,

仲同爸爸講, 睇唔 arm. 叫爸爸走先, 我地要去買校服. 

老公都覺唔妥, 問我地有冇講大話. 

我都一頭霧水!!   (睇唔 arm?! - 大仔不嬲對款式都無乜所謂, 我揀比佢著就得) 

老公扯左之後, 大仔就同我解釋, 因爸爸嫌三嫌四, 好多說話講, 佢係到買唔到.

我勸大仔, 雖然爸爸份人係乜都要彈, 只要你覺得無錯既野, 應該同佢講. 

但大仔反駁, 出聲咪棧比佢鬧得更利害.

我無言以對, 老公份人就係咁, 咩都反對, 為反對而反對!

夜晚, 老公返到屋企, 見到對新波鞋, 的確鵝左我幾句. 

我已經習慣, 對於佢既指指點點, 只要不加理會, 佢係唔會打埋我既.  

不過, 成日為左呢 d 雞毛蒜皮野, 搞到仔仔地唔開心, 好無聊!

                                                 *            *           *

我嘗試維繫一個家庭比仔仔, 但始終人同人之間既關係/溝通, 係日積月累;

仔仔地一路成長, 有思想, 觀察到好多野.  

將來仔仔點睇呢個咩都反對既爸爸, 我都有d 擔心. 依家仲細, 敢怒不敢言,

但若果到青春期....反叛起上黎, 咩情緒都放大晒.  若爸爸打佢地, 佢地可能會還手..

哎....唔敢再諗!!!