囍帖

終於去咗攞帖喇, 酒店送嘅.

之前去wedding expo都有留意吓啲帖, 有啲真係幾靚, 不過當然都會好貴啦.  而且好多都有最少訂購量, 我哋呢啲只需要幾十張嘅, 人哋都懶得理我哋!  好彩酒店有送, 雖然唔係好靚, 不過不失啦, 而且有幾多人真係會留你張帖喺屋企呢? 咁靚都係滿足一吓自己, 啲guest攞咗封利是&餅咭就掉啦, 頂多留到去完飲! 我哋就係一直咁persuade自己唔好駛錢去買靚靚帖喇, wakakaka~

不過都有麻煩嘢, 就係酒店只係送帖面, 內頁要自己搞掂.  冇問題, 出去搵人印內頁 = color print一樣, 應該好易啫!  原本想搵人印牛油紙 + 燙金, 竟然要成$5-6一張, 吓??? 唔通我大鄉里, 乜印嘢要咁貴嘅咩?? 出去金都有啲普通desgin嘅帖加印刷都係差唔多價錢咋喎!  再打探吓原來貴在燙金, 而且少數量, 每張平均價就會高啲啦.  我呢啲師奶仔當然又再諗辦法喇, 最後比我同honey諗到去書局買啲靚靚紙自己印.  雖然啲紙都唔平, 仲要屋企個printer嘅彩色墨已經乾哂, 要走去買盒新墨, 加加埋埋都唔係平好多, 而且要自己搵帖嘅內容, 較啱位, 又要 cut 紙 fit 返張帖面, 都好煩吓, 不過自己印嘅滿足感, 真係非筆墨可以形容呀!!!