再談港女

又講港女??

雖然呢個話題都幾out吓, 不過近排我聽到一段對話令我再次諗起呢個稱號!

話說有一晚放工落大雨 ... 我喺巴士上聽到一個女仔大大聲與電話另一方嘅對話 ...

"你喺邊呀?"

"避雨? 我唔信囉 ~"

"避雨? 避成半個鐘? 我唔信囉 ~ 半個鐘都打唔到電話比我?"

"我唔信囉 ~"

"你宜家喺邊呀?"

"地鐵? 乜宜家地鐵冇報站嘅咩?"

"你頭先去咗邊呀?"

再重覆以上對話一次, 語氣exactly一樣, 內容大同小異.

之後 ...

"想點? 係你想點呀?"

"咩想點呀? 不如我話比你聽喇, 你去咗飲嘢唔方便打電話比我, 係咪呀?"

差唔多半個鐘後我要落車, 好想跟進佢哋嘅對話, 不過應該同以上對話差唔多呱, 再聽都覺得好煩, 當然落車時我都八吓個女仔咩樣啦, 咦, 正常女仔樣喎, 唔太靚亦唔算醜, 不過如果唔係聽到以上對話你點都想像唔到一個咁正常嘅女仔會講啲咁唔正常嘅說話!

第一, 喺巴士上大大聲講電話係一種冇禮貌嘅表現! 強迫全車人聽你冇理取鬧嘅對話!

第二, 女方態度非常不友善, "你對我好, 我對你好", 你咁嘅態度, 對方實唔忿氣, 原本想講真話都收返, 懶得理你啦.

第三, 成段對話之後, 女方想得到咩呢? 想對方認錯?  好喇, 就當對方向你認錯喇, 比你威哂! 但係結果呢?  電視都有話啦 "嬴咗場交, 輸咗個家, 值得咩?" 當然唔會係輸咗個家咁嚴重喇, 不過至少輸咗大家之間嘅尊重!

無論係父母子女, 夫妻, 情侶, 朋友 ... 都應該互相尊重, 大家都應該有自己嘅空間, 迫得太緊只會令對方作出反抗, 最後受苦嘅都係自己!

呢段對話仲有好多好多嘢可以探討, 不過又唔係三言兩語可以解決, 亦都唔係每一件事情我哋外人可以理解, 各有前因, 有之前嘅因先有現在嘅果, 我哋旁人絕對唔可以多事, 只係覺得成件事情好有趣才分享一吓.

** 想必當時巴士上大部份的男士心裡都會想著"港女"一詞吧!?