幼潛第九課

上星期六，幼潛不經不覺已經去到第9課啦，即係尾2一堂，我和婆婆帶宇昊返學啦。

平時如果得我和婆婆帶宇昊返學，宇昊放學又到我去返學，得婆婆一個帶宇昊返屋企，所以帶唔到BB車，因為得1個大人無辦法上落車，而我又唔夠手力抱宇昊，只可以用揹帶。這兩次都無揹足全程，搭完巴士，再搭完西鐵，先至開始揹住宇昊行返學校，大約要15-20分鐘啦，家陣天氣涼，著衫多o左，揹得特別累，要麻煩婆婆陪宇昊上頭半堂。

這天宇昊照舊9點幾起床，扭眼瞓的風險都好大。上學途中，揹住宇昊行無耐，佢已經用塊面"卒"落我心口，噢，睡魔又急call了，無辦法，學都要照返，幸好這天唔係太扭計，但就好似遊魂咁。

返到學校，好論盡咁安頓好，我們到達時已經有很多少朋友到了，這天很難得地齊人，8個小朋友都返齊來，加埋家長實在好熱鬧。

玩完玩具熱身，先來唱歡迎歌。今次只有一款樂器，不用小朋友手指指去選擇，但就要舉手表示要，然後起身"dum"腳仔。宇昊都叫有點反應啦，又勉強咁"wu"前身謝謝﹝宇昊係誓不低頭的，唯有成個身"wu"前代表點頭﹞。

唱完歌又係派名字貼紙的時候，宇昊繼續魂不附體，迷迷網網的。

第一個環節，手眼協調訓練，穿珠仔。每個獲派一條毛毛鐵"線"，和一堆剪成小段的彩色粗飲管，要小朋友一粒一粒的穿入去，婆婆捉住宇昊手仔去穿，都算順利，最後圈成小手鐲帶回家，又可以拆開再玩過。

第二個環節，大小概念訓練，疊杯杯。每人獲派3個大、中、少杯，練習分大小疊好。雖然這天宇昊無乜表現，但這個我不擔心，因為宇昊都周不時在家玩大小杯。

食餅餅時間，先來派濕紙巾抹手，然後小朋友要把用完的濕紙巾交到張姨姨的籃內。我叫宇昊拿濕紙巾去掉吧，點知宇昊好醒目咁拿去課室的垃圾筒去掉，我又估唔到佢記得喎。

第三個環節，單腳平衡訓練，踢波波。姨姨拿了兩個波出來，小朋友分兩邊，排隊踢波，要訓練將腳拉後再大腳踢。我叫婆婆去休息，我陪宇昊踢波，這個環節比較混亂，小朋友見到波都好興奮，根本就排唔成隊，又掉波，宇昊都勉強試到一、兩次，最後姨姨拿出大量波波給小朋友自由發揮。

小朋友玩波的時間，又是總結的時候。落堂後張姨姨特別走來擁抱宇昊，然後同宇昊講“你真係好眼瞓喎”，好攪笑。下堂就「畢業」啦，會頒發証書，又會報告成績，真係好期待。

↓這堂的習作