你今日已經殺左好多人架啦XD

前晚凌晨三點，得閒得滯重看大結局，俾呢句對白搞到我笑左出黎。不得不提秦沛真係好野。呢幾年睇佢越演越慈祥仲驚佢無左種霸氣，但係呢個角色完全可以同十六年前賭聖入面既秦爺相比。

呢句對白抵死既係唔係所有人都係佢「今日」殺既，如果將「老爺」兩個字改做「編劇」就完全正確啦。仲抵死既係任何一個正常人都唔會對自己老爺咁講，呢句話只會係夜訪吸血鬼（1994）入面畢彼特既Louis對湯告魯斯既Lestat講「你今日已經殺左好多人啦，吸夠血啦」。爆笑

不過，我覺得今次呢套野竟然可以咁富政治含意咁大膽。尤其係近奧運既風頭火勢時刻，竟然可以咁唔愛國唔愛黨寫咁有諷刺性既野，真係抵拍手掌。

首先寫兩個對白上的平行︰一，小蝶︰「老爺，你今日已經殺左好多人啦」同「天安門前面冇死過一個人」；二，老爺︰「我今日叫你地黎，係話俾你地聽點做，唔係問你地既意見」對紫陽︰「重大決定都得請示小平同志」。品味一下，品味一下。

劇集中老爺做所有野都係為尚家的穩定繁榮，個邏輯其實真係好抵死。為左尚家穩定繁榮，弟弟妹妹女兒幸福可以置之不理，通姦的四姨太要死。為利益可以用浸人豬籠威脅弟婦，為面子又可以不顧承諾殺人。全屋人都可以為尚家的穩定繁榮犧牲，而甚麼才是穩定繁榮？當然係老爺話事啦。公平唔公平唔重要，如果老爺認為贖回賣身契是破壞繁榮穩定，就係破壞繁榮穩定。相反如果老爺認為金豬賄賂係繁榮穩定既，就係架啦。所以老爺如果有日覺得官倒係好野，咁你反對官倒要反貪腐你自然係破壞穩定繁榮啦。

最深刻絕對係最後一幕︰老爺一手拿著火把，把所有他認為是和他作對的女人都鎖起來，說「我今日要清理門戶，一次過燒死你地」。因為他才是尚家當家，領頭人，只有他才懂得怎樣做尚家會安定繁榮。其他反對他的人都只不過是想顛覆尚家的動亂分子。所以一次鎖起放把火清場，呀，係清理門戶，就係完全正確，係勘平動亂的最佳方法。就算那些是手無縛雞之力的婦人也不例外。呀，錯了，她們絕對有動亂的能力，君不見三太太一句真一句假就令到老爺迷惘的問「我都唔知你邊句真邊句假﹗」，令老爺心煩意亂皮質醇升高呢個絕對係危害老爺健康啦。然後二太太一手一個香爐躉咁大力一野車過去老爺個頭就直頭係武裝動亂啦。好明顯成班女人二十集以來一直都係陰謀顛覆老爺對尚家的管理。不，是顛覆尚家的和平安定繁榮。

唔知點解最後結局老爺死左就死左，二老爺都要喊呢？動亂最後勘平唔到，但係尚家最高權力去左邊個度呢？