《與蝶同眠》和《愛怪物的你》︰想唔K但係始終都K既天后

由Ten Most Wanted開始，天后似乎一直都好努力咁轉型，嘗試唔同方面既音樂，唔再係賣K歌。但係到In Motion都依然仲係所謂既「轉型中」。成隻碟入面我都係loop住兩首歌黎聽︰《與蝶同眠》同《愛怪物的你》。

某程度上我就覺得係所謂呀「容祖兒擺脫k后風格」既諷刺啦。與蝶同眠既intro同過門既音樂真係好唔錯，第一段歌齋用琴同少少絃樂既arrangement都唔錯。但係去到後面d 鼓聲就真係太過唔得，副歌入面「磨掉這上半生下半生還是要」入面磨、上、下三個音襯既鼓聲真係好distracting，同埋好多沙沙咁既聲令人好唔舒服。鼓聲有時o係d唔應該玩野既位玩野令人好煩。如果可以既其實我覺得好似何韻詩版既禁色，帶點smoky 既編曲簡簡單單可能會仲討好。

唔知係林夕既歌詞太深還是容祖兒唔明首詞，其實歌詞有點新詩既味道，但係除左第一段仲知道自己唱咩之外，去到中段「吻完」開始佢已經係用緊果種苦情慘情歌既聲線去唱。到最後副歌就真係完全聽唔懂佢既聲線感情同歌詞既關係。我未聽過有人唱「隨緣吧」唱到咁肉緊。到最後「隨便吧玩耍的當時」應該俾少少頹廢既感覺，但係我都聽唔出有。

相對黎講同佢一路風格極度吻合既「愛怪物的你」佢就交到貨有餘。編曲簡單易聽易跟住唱，歌詞簡單易懂，完全具備大路k 歌條件。歌詞一聽就懂，感情相當大路，容易投入。果句「越是誠懇對待　越是成為良心障礙」就好唔錯，「感激得你仰手擁抱怪獸，感激卻無緣變做愛」個感情既轉折位就相當圓潤交足貨。亦都聽到佢既聲線其實係有點進步。

但係呢我就懷念當年佢以相當稚嫩既聲線唱「再見我的初戀」。雖然歌聲有點刺耳，歌藝唔夠好，但係同首歌稚嫩既愛情觀相當切合。主觀既口味，我就唔中意而家呢位k 后咁有聲色藝但係事實上始終都仲係大路k 歌天后啦。