我呢世都唔再”ｍｏｃ”牙啦　＞＜

我做左27年人都未試過"moc"牙既(或者係細個個陣"moc"左唔知道)，今日一"moc"就黎最難搞既智慧齒‥‥ 由出公司個刻開始已經好驚架啦‥‥去到醫生度6點未夠‥坐左幾個字先去再照xRAY，又等多陣就入去打麻醉藥，打完又坐‥‥ 等呀等‥‥到7點左右入去受刑啦‥‥ 我都唔知做左d咩，只係知道佢話用手術刀切開d肉，但係我好似好痛苦咁，佢就幫我再加麻醉藥，仲打埋落我個口唇添‥‥ 又再坐多10分鐘左右‥‥佢又黎啦‥‥ 佢係咁用力扯我隻牙，但係好似都唔係好扯到出黎，但係我已經掙扎哂又流哂眼水‥佢見我係咁郁唔係好得，於是用第二種方法‥ 就係搵野挫‥‥挫左幾下又係咁鑽‥‥ 鑽完又吸、吸完又鑽，再吸完又再挫‥之後又試扯‥‥佢係咁整我就係咁郁，仲愈流愈多眼淚‥‥最後阿醫生都係頂我唔順‥‥投降唔幫我做啦‥‥佢話我太驚同埋太激動，係咁郁來郁去會好危險‥‥於是佢就話唔收我錢，介紹我去睇一個程醫生，全身麻醉咁去脫‥‥ 真係好瘀呀﹗ 醫生停左手之後我仲忍唔住係咁喊到扯哂吼‥‥ 我真係唔想再去搞隻牙啦‥‥但係而家"moc"到一半，唔3唔4咁‥ 唔"moc"唔得‥‥但係要全身麻醉真係好驚呀‥‥會唔會麻醉完起唔返身架？係咪真係麻醉左就唔會痛架？我今日麻醉左3 rounds都仲痛既‥‥ 醫生真係慘呀‥‥ 幫我照哂x光、又用左咁多麻醉藥，又浪費左咁多時間俾我‥‥最後居然無$$收‥‥ 我都覺得好唔好意思呀﹗﹗

我而家仲好驚，我知道應該聽日盡快去"moc"埋個隻爛牙‥‥但係太恐怖，我唔敢呀‥‥ 點算好呢‥‥咁大個人連"moc"隻牙都驚成咁，真係無鬼用呀﹗我決定以後都唔再食糖，早晚認認真真咁擦牙‥‥ 我唔敢再有蛀牙啦‥‥ 我突然諗返起以前牙虫村既廣告‥‥ 小朋友真係要乖呀‥‥我而家好擔心珮珮呀‥‥佢d牙咁差，我怕佢大個左要整過哂棚牙‥‥ 會好辛苦架陰公‥‥

而家既麻醉藥未過，都唔係好覺痛‥‥不過隻牙仲係咁流血，快d停啦‥‥ 以免做第一個因為"moc"唔成牙而失血過多既人‥‥

我去完醫生度打左俾cherrie同阿婷，多謝2位安慰我呀~~ 我真係太無用啦‥‥ 我已經決定左唔會生仔架啦‥個少少痛我都驚成咁，生仔咁十級痛既野我又點受得住呀‥‥ 阿婷你真係好叻呀﹗母愛真偉大~~~ 婷媽媽生日快樂﹗﹗你係我既偶像呀﹗﹗二家姐都係‥‥媽媽都係‥‥真係世上只有媽媽好呀‥‥