又一日

今日, 我都係預左冇節目架喇~~就算有人約, 我都唔會出, 除非係佢啦 (我打過比佢, 不過係事頭婆聽, 所以自己驚驚收線), 不過......意料之內, 今日果然係自己一個過~~

禽晚去Crystal 同 Winkie個Blog, 見到佢地今日會到海港城 LCX度義賣T-SHIRT為四川災民籌款, 身為Hotcha既 fans, 我當然要去捧場啦, 反正冇節目, 又可以支持偶像, 更可以做善事, 一舉數得~~

個活動話兩點半開始, 二點三去到LCX (其實禽晚都打左電話問海港城, 話有活動, 會向facess 門口舉行)~~

但係去到見唔係好多人, 有d小學生準備表演......再極目一望, 唔見有Hotcha's fans, 心諗無去錯地方丫, 四川籌款, facess 隔離, 又有表演......唔唔......可能過一陣先進行義賣, 呢d活動通常有遲冇早, 再等多陣......因為企左向個好位, 唔願走......

等到二點九, 大會請王友良先生表演, 唱[我信]......講真, 佢真係幾靚仔架, 好似鄭伊健......不過我係想支持Hotcha......

王先生唱完, 又到另一位女新人唱, 雖然都係靚人, 但係我只係想支持Hotcha......

心諗, 唔通唔係呢度......次後走人, 去返海港城, 望一望時間, 差不多三點~~

咦.......[一人一竹願, 送暖到四川]?......係喎......facess有兩邊, 我掛住睇表演個邊, 以為有義賣......唔通係呢邊???

算啦~~都三點幾, Hotcha都應該走左, 買左少少野支持下, 跟住走人~~

行到五枝旗桿, 又見到安x為四川籌款, 又捐左少少.......

行到匯豐銀行總行門口, 又有四川籌款........再捐少少......

到最後, 都冇賣到T-shirt, 哈~~

行書局, 第一眼見到既係生日咭(平時都唔會望個個位)......睇左陣書, 壓止自己既買書慾......但係點知坐小巴返屋企, 一落車, 見到開左間散書檔......買左好多本, 鬼叫d書咁抵咩......

晚黑返屋企做乖仔, 陪阿媽過節......食完飯睇獎門人, 超級無敵 close the door 度, 要估[生日快樂], 盧惠光先生好快估到~~哈哈~~

其實今日個天都算係咁, 一連落左個幾星期大雨, 禽日重黑雨, 今日點都叫好天, 係朝早落過一陣, 其餘成日都好好天, 重間中有陽光添~~

重有唔夠一個鐘就又一日喇~~雖然我今日見唔到Hotcha; 佢冇出現, 我亦搵唔到佢, 但係明天仍要繼續, 聽日又係新既一年喇~~自己要加油啊!!!