自己一個返學(N1)

經過上個禮拜MAMI同DADI 陪咗返三日學之後, 第四日就要自己一個入去學校, MAMI只係送到去門口, 都係個零鐘姐,9:30-11:00 第一日好叻叻,完全無喊過, 放學時一見到我就笑哂咁,問番老師話佢開頭有叫咗幾聲搵MAMA之後出咗去玩就唔記得咗LOO

第二日自己返學, 開頭都無問題喎,同佢換完鞋之後SAY GOODBYE 之際,就有個EE抱起咗佢, 我都已經話等一陣先, 因為我問緊老師要唔要攞張接送咭出來, 都未講完佢一手抱起明德仔啦, 咁佢咪喊囉, 可能佢太心急啦, 但抱到入去見佢好快就收咗聲啦

隔咗禮拜六日之後, 琴日星期一又如何呢? 

未到學校門口我話一陣MAMA去買餸, 你自己入去啦, 入去玩車車, 好無啊, 都未講完,佢已經話唔入去啦, 又眼濕濕咁啦, 我一路同佢講,佢就一路話唔返學, 氹咗好耐都唔得呢, 好啦入去換鞋,呢個時候已經扭得好緊要, 好辛苦先同佢除到對鞋,但點都唔肯著番另一對, 之後個阿E就來抱咗佢入去,佢話入到去先同佢著喎  佢抱咗阿仔入間房,唔夠兩秒鐘就出番來, 好似無喊到已經收咗聲,EE抱住佢抺眼淚, 我梗係閃埋一二角先, 費事佢見到我,之後先攞番著鞋同書包入去, 到接放學時,佢一見到我又眼紅紅啦, 我即刻攞隻KIDER出奇蛋出來止住咗.

唔知係咪隔咗個WEEKEND呢,我眼見差唔多個個都喊, 真係無一個唔喊喎, 真係嘈到不得了, 但返到屋企問佢明天仲番唔番學啊?  佢就一時一個答案.

今日已經係第三日啦, 一落車就要抱抱, 抱到學校門口, 時間尚早就同幾個家長傾吓先入去啦, 仲全程都要抱住唔肯落地,入去換鞋無問題喎, 眼見都有好多個小朋友喊, 真係好怕佢會見到人喊佢又喊, 因為坐o係佢側邊換鞋o既另一個小朋友真係喊得好可憐, 今次我特登唔搵上次個阿e帶佢入去, 因為我怕可能上次佢會驚咗, 果然無問題喎, 唔洗抱,自己拖住阿e隻手行入去, 仲回頭同我講bye bye mama, 校長啱啱企o係隔離, 都拍哂手讚叻仔, 今次mama好放心啦, 今日放十二點,食埋飯先放學, 老師話佢開頭都肯自己"不"來食,但之後就要餵啦, 但都話食咗成碗又飲咗湯喎, 真係咁乖?? o係屋企連半碗都食唔到喎,不過老師咁講咪咁聽囉 ^_^咁樣仲好起碼食飯唔洗咁大壓力,mama餵你食飯真係好頭痛.下個禮拜開始就要試吓瞓埋晏覺, 希望都ok啦.