N1終於搞掂啦~

原本我無唸住俾哥哥返N1, 唸住自己湊佢同佢返吓PG就算啦, 但發覺佢開始大啦, 日日都唔同佢做乜好, 番PG又好似已經唔多啱咁啦喎, 個個呢個年紀都去哂番學啦, 如果同D太細個BB一齊玩又好似好悶無乜意思, 另外就係我想湊妹妹多D, 如果湊住哥哥我無可能一拖二同佢哋出去, 所以而家多數同哥哥出街, 但就變咗妹妹好唔鍾意坐BB車, 成日要抱住, 更加唔洗旨意佢o係車仔度瞓覺. 所以就好遲好遲先搵d仲有位D o既全日班.

上個禮拜終終於了咗件事啦, 搞掂哂所有文件, 交埋錢買校服,書包,被單咁(不過我就唔買冬季住, 我同老師講遲d先啦, 好彩老師都ok姐^_^) 呢間學校每個禮拜六都會搞個PG俾D小朋友番去玩吓, 所以明德仔一D都唔陌生, MAMI 同老師傾緊計時,佢就自己去攞玩具玩, 玩完啦就周圍走, 好似同佢玩捉E欣咁,老師都話佢真係好活躍,一D都唔驚, 我話希望到時唔好收到咁多投訴啦!

呢間學校要搭校車咖, 唔知明德仔自己一個搭車點呢? 到時問吓保姆車司機可唔可以俾我跟住一齊搭一兩日先, 好多嘢都唔知佢得唔得? 自己食飯, 自己去toilet (但仲未戒片,  老師話返學會幇佢戒喎),自己瞓覺(好彩我五月開始可以train到佢自己瞓姐, 呢個係炒咗工人後最大o既得著)唉~ 不過個個都係咁啦, 可能ok 呢.希望無問題, 好快就可以適應到啦.

老師話佢哋學校八月廿日先放暑假,叫我哋可以八月同佢試吓番半個月喎, 因為九月開學實有幾個小朋友喊喎, 咁怕佢可能又會跟住一齊喊, 但一班有成十幾個小朋友, 又唔係個個都係新生, 有d係細仔之前已經讀咗幾個月,咁o個d就無問題唔會喊, 如果八月返就全部都係讀開o既, 佢可能會好d喎, 但返半個月當然都係要交一個月錢啦, 但半個月適應期過咗, 我九月就可以跟正常時間一樣咁番全日, 又可以俾佢搭校車, 我都覺得幾好喎, 但唸唸吓佢d PG都未上完, 要番到八月中, 所以都係九月先開始番學啦.

呢間學校唔算大，不過叫做有個户外地方俾佢哋玩吓，唔洗成日屈o係課室內, 但又怕會好多蚊喎, 無計啦, 針無兩頭利, 唯有同佢貼蚊貼搽蚊怕水啦.

佢哋係開放式課室, 但唔知咁樣隔離班上堂會唔會嘈到呢?

希望你九月返學可以好開心, 好乖乖聽話, 學守紀律,咁我就多D陪住妹妹啦.