睇吓仲可以捱到幾耐~

上個禮拜打咗俾agent 叫佢同我哋個工人姐姐傾吓計, 個agent 都幾好即刻第二日就搵咗佢上去間公司, 事後工人返到來都無話我哋知佢上過間間公司度, 咁我哋當然都無問啦.

事源係上個禮拜六,我真係好好好嬲! 平時哥哥七點鐘就起身,咁工人姐姐就沖奶俾佢飲, 跟住去臭臭咁啦, 之後就會出廰玩, 但到九點幾我o係房都聽唔到哥哥把聲喎, 因為平時佢玩嘢點都會有d聲咖嘛, 咁我就出去睇吓啦, 原來o係房(哥哥同工人一間房, 而我哋就同妹妹一間)哥哥就企係張床邊挨住個床欄玩緊, 而工人就成個頭挨哂落明德仔個背脊度瞓覺喎, 可能佢唸住咁樣一方面又可以唔俾佢周圍走, 另一方面又可以恰吓啦. 有無搞錯啊, 咁都得, 不過我按住自己把火, 無即時話佢, 我淨係問佢做乜嘢,佢就黑哂臉咁話阿仔今朝六點幾起咗身, 琴晚都係瞓得唔好, 醒咗幾次, 六點幾起身飲完奶又唔瞓, 跟住出廰玩咗一陣,又捉番佢入房再俾多支奶奶佢唸住佢飲完可以再瞓, 但都係唔想瞓, (隔咁短時間邊瞓到啊, 平時佢都唔係唔知咖啦, 佢起碼要要玩到成十一,二點先可以再瞓咖嘛,同埋佢如果係唔瞓你點逼佢都係唔瞓咖啦, 嘥時間),結果搞到成十點幾乜都未做, 之後嫲嫲來接手,我就出咗去上堂.

後來我再問番,嫲嫲話我走咗之後, 工人又同阿仔入咗房,唔係啊~~ 又逼佢瞓, 跟住嫲嫲叫佢出廰玩, 工人就話有好多嘢要做啊,嫲嫲見咁樣於是就話帶佢落公園玩一陣等佢可以做嘢. (呢招都唔係第一次出咖啦, 成日都o係嫲嫲面前話好攰啊, 好多嘢做,希望嫲嫲湊開阿仔, 又o係度數今日有幾多件衫要洗, 喂~我已經叫佢用洗衣機洗bb d衫咖啦, 只係口水肩同紗巾,仲有如果有屎有尿o既就要先用手洗咗先, 然後再放入機洗, 咁都話多啊??) 

我都好想問吓如果平時d dadi mami 要返工, 日頭得工人湊住個小朋友,又要做埋家務, 到底點做咖呢? 點解個個都得,佢又唔得呢? 好多時如果我o係屋企都係一個睇兩個,佢就做嘢,落街買餸咁.夜晚又要搞到成十一點幾先瞓喎, 我屋企又唔係大, 妹妹都唔洗佢湊, 點解佢淨係湊一個明德仔都搞唔掂??

好多時阿仔又唔痴佢喎, 有時我同阿仔返完playgroup 番來, 佢開完門就走咗去做其它嘢, 佢係咪應咳放低手頭上o既嘢, 從我手中接過阿仔,然後同佢除鞋洗手咁呢? 琴日我先同老公講開呢個問題, 佢話呢個係我o既問題, 話我無俾清晰指示叫工人點做, 例如洗手咁, 唔係講一次做一次, 唔講就唔做, 而係叫佢以後每次都要咁做, 有時阿仔又痴住我唔俾佢抱喎, 於是工人咪又有大條道理唔洗做囉, 老公又話呢個係阿仔o既問題喎, 唔關工人事, 我好唔認同, 好似你出去做嘢咁, 人哋請得你番來梗係幇公司手做嘢, 如果有問題而又解決唔到o既, 咁都唔算係個人有問題嗎? 我覺得如果阿仔唔肯跟工人o既, 工人應該唸吓攞咩嘢引佢, 或者講d嘢tum 吓小朋友, 而唔係等我做番, 如果再唔得o既就即係工人本身唔識得同小朋友溝通.  我眼見好多朋友,blog 友請工人返來做嘢, 個仔o係工人手下好聽話,坐定定咁食飯, 同佢瞓覺又無乜大問題, 反而工人放假個mami 會就好頭痛搞唔掂, 但相反我呢個呢.... 阿仔食飯坐唔定, 有時直情連坐都唔肯坐落去張highchair度, 瞓覺就一時時啦, 有時要我同佢瞓先瞓到, 不過又好安慰o既就係阿仔仲好痴我,我除時唔要個工人都得, 唔怕自己搞唔掂, 最多辛苦d要做埋家務姐.

請個工人返來湊小朋友, 連最基本o既餵飯同瞓覺跟住清潔屋企都搞唔掂,咁我請來做乜呢? 有時叫佢做o個樣嘢佢唔係即刻做, 隔多陣我叫多佢一次, 跟住佢一路可以話"IF I HAVEN'T FINISH THE WORK, I CAN'T SLEEP" 我扮傻咁話咩sleep啊? 佢又再講多次, 我咪話咁你咪快d做囉, 做完咪有得sleep 囉, (我當然唔會夜晚無啦啦叫佢做嘢啦)係佢把口真係好勁, 連個agent 都話佢好醒, 佢之前仲話啊, 如果自己見到間屋企dirty,佢個心會好唔舒服, 又會瞓唔著喎.... 有一次佢放完假夜晚返來唔記得掉垃圾, 我自己掉咗啦,第二朝問番佢係咪攰過頭去咗瞓覺唔記得掉啊? 佢話係啦唔怪得自己琴晚瞓唔到啦, 成晚囉囉luen咁 ,成日好似有d咩未做咁. 你話佢把口幾勁~ 所以我而家要好小心佢, 唔好有咩痛腳俾佢捉住, 唔係第日炒佢唔知佢會出d咩蠱惑嘢.

仲有樣嘢聽到令我好驚訝~

工人:  我老公想來香港旅行喎, 想住埋o係我哋屋企~

嫲嫲: 點得啊? 有兩個bb o係度,去住酒店囉.

工人:酒店好貴咖~

嫲嫲: 有d好平咖姐. (又成日問嫲嫲住o係邊喎, 因為佢未上過去,只係去過婆婆屋企)

搞乜啊? 點解工人會咁樣講咖呢? 呢件事我都有同agent講, 佢話o個邊d男人好無用咖咋, 只係想要佢女人搵錢,邊會話去旅行啊, 同埋佢都話從來無聽個有工人咁講過, 到底佢想玩咩呢? 唸計d咩計仔呢?

有時真係好唔明佢哋點唸嘢? 啱啱還哂錢, 而家所賺o既每一分錢都係自己落袋,點解仲唔落力d做呢? 唔通真係以為過咗頭七個月就唸住僱主唔會炒佢哋??

不過AGENT都話嫲嫲其實係一個好好o既角色, 可以收吓風喎, 但佢對婆婆絕對唔敢呻咖喎, 呢d人真係見你好恰就食住上.

所以我哋會再睇多輪先,如果佢都係無改善我哋會即炒, 唔會俾佢留低, 到時妹妹送去婆婆度住住先, 我自己湊番哥哥, 再請個鐘點做吓家務咁, 或者俾佢番N1.