補影 + 揀相@Mona Lisa

今日, 終於完成左 Mona Lisa 影婚紗相呢件大事了!! 呢件真係一件大事, 因為足足搞左成兩個月... 而今日終於都完滿結束了!!

今日一早 10:30am 入到去就化妝 set 頭影相, 主要係為左補影珀麗灣影樓的露台青馬大橋景以及波檯附近的梳化景, 不過梳化已被搬去另一個地方, 波檯亦變成了餐檯, 結果我地影了新加的餐檯景。 本來我同小紀覺得影餐檯怪怪的, 但影出來的效果卻是出奇地好! 在呢個新景, Anson 又幫我影左張我超級喜歡的單人相 , 搞到我忍唔住加晒呢張做 5" x 7" 相!

我問過一下化妝師點解取消波檯景, 她話因為覺得 D 人影完相但無咩點揀呢個景喎! 經她咁樣講一講, 我同小紀都覺得波檯景其實真係無咩野好影, 亦影得唔係太靚; 相反, 餐檯景卻可以影出好多唔同的效果/感覺, 所以各位為左無波檯景影而失落的朋友其實無需失望喔!!

今日幫我化妝的係 Irene, 但前兩次影時係阿 Ming 幫我化妝的。 其實一開始 join 時我就向跟我張單的 sales 姐姐 (TST 店 Tammy Pak 小姐) request Irene 化妝, 但呢位 sales 唔係做野的, 全無 follow 我的 request, 最後連 Irene 放大假都唔知而安排唔到 Irene 俾我, 所以先變左阿 Ming 幫我化妝。 我當初 request Irene 其實係因為想試埋妝, 如 OK 的話打算 book 她做我 big date 的化妝師的, 但無奈 Tammy 小姐真係只識落單唔識跟單! 她唔只呢單野跟得差, 基本上所有野她成日都要我打電話去追她先會覆, 我都唔明她點做 sales, 點解成日要客 call 她而唔係她主動 call D 客架呢?! 我需要重影其實都係因為呢位 Tammy 小姐安排不周!

阿 Ming 的化妝 set 頭其實唔差的, 人亦很 nice, 但覺得她有點堅持己見... 有時覺得個造型有 D 問題想她執一執, 她就未必太願意幫你執囉... 咁今次補影, 就 request 安排 Irene 化妝囉! 不過都無打算找 Irene 做 big date 的化妝師了! 我地亦 request 安排翻第一次影相時的攝影師助手細 Alan 俾我地, 因為重影時轉了另一個助手叫 Kenneth, 他差到不得了, 唔識打燈﹑唔識拎襟花俾新郎﹑做野又好似心不在焉咁樣! 細 Alan 就唔同呢, 非常之 nice 和細心!! 而以我所知, Kenneth 已經無做喇, 都唔知係表現差被人炒還是他本來就唔想撈所以就表現差囉!

不過叫 Irene 幫我化妝 set 頭真係難倒她了, 因為我唔想我 D 婚紗相唔連戲, 所以我 request 化妝﹑set 頭 & 飾物配搭盡量跟翻之前影時的一樣。 化妝當然難唔到 Irene 啦, 她化的好快手, 妝亦很薄很貼! 倒是 set 頭卻令她頭痛了, 我地花左好多時間去研究之前影時個頭係點 set, 盡量去 set 翻個一模一樣的! 

搞下搞下, 都成 4 點幾先補影完。 由於大家都唔想又出 D 咩問題又搞到要重影, 同埋我地 8 月 都需要相片去做 slide show, 所以補影完後他們即刻拎 D 相去調色﹑做 effect, 我地就即日睇埋補影 D 相, 又再 review 下之前揀左 D 相, 又揀下油畫﹑大相﹑畫框等等, 結果搞到 11:00pm先走人... =.='' 

其實呢輯相, 第 1 次影時係 4 月中, 我地搞左足足 2 個月先完滿結束! 其間其實我都覺得自己好煩, 對住 Anson﹑細 Alan﹑阿 Ming﹑Irene 時都覺得好唔自然 & 唔好意思, 因為麻煩左他們好多次! 而我對負責處理我揀相的 sales Suki 係最 feel sorry 的, 因為前前後後為左揀相 & 重影的問題煩左她好多次, 不過她從來都係好好脾氣, 重好幫忙的幫我地安排重新揀相和重影, 我真係要高度讚揚她! 

就 Mona Lisa 呢件事, 我都問過小紀幾次其實我地兩個係咪好煩, 我地兩個都一致認為 "係" 的, 哈哈!     不過其實 Mona Lisa 真係我的主打婚紗相, 當初 join 時就知道自己會買相和 upgrade 相簿整靚靚大婚果時用, 所以我真係想影好 D 影靚 D, 話晒買相和 upgrade 相簿真係唔少錢, 無理由唔鍾意都收貨丫! 不過其實我覺得最錯都係跟我張單果位 sales Tammy 姐! 如果唔係她辦事不力 (唔只 Irene 單野), 第一次影時就唔會搞到立立亂, 一 take 過搞掂唔駛搞到重影 & 補影! 所以我推舉大家影 Mona Lisa, 不過就一定唔好揾呢位 sales 跟單喇!

由於我同小紀影左咁多次, 所以可揀相的數量自然都會好多, 結果最後... 我地 total 要左 143 張相!! 我地亦 upgrade 左本大相簿做如下呢本 design 相簿:

我真係好鍾意呢本相簿丫, 唔知 Mona Lisa 會點幫我排版呢? 好彩她們安排可以俾我先看排版, 確認 OK 先做相簿! 希望 D 相會執得靚靚﹑排得靚靚啦!

因為太夜和趕住走的關係, 我地抄了些相片 # 要求 send 相辦俾我地, 應該下星期便會有吧~~ 很想快 D 收到呢!!

最後想特別鳴謝:

試衫姐姐 - Winnie
攝影師 - Anson
攝影師助手 - 細 Alan
化妝師 - 阿 Ming 和 Irene
協助揀相的 sales - Suki
珀麗灣店的經理 - Eva