灣仔合和中心帝廷皇宮 = 垃圾

呢排無咩點寫 blog, 因為有件好﹑好﹑好﹑好唔開心的事發生...

我一直都 keep 住問皇上皇, 我將會擺酒果間帝廷皇宮 (位於灣仔合和中心) 幾時開張。 我知道上星期四 (17/9) 係呢間酒樓的開張日, 我其實一直都好擔心個場靚唔靚, 所以上星期四一放工我就同小紀落去灣仔睇場。 沿途... 我一直都好緊張, 個心忐忑不安... 因為真係好驚唔知個場係點既樣...

去到酒樓... 見到銅鑼灣分店的經理曹小姐, 她好好招呼, 帶我地去睇場。 不過全程我都無咩表情, 因為我覺得個場好唔得! 當初謝生同我講, 灣仔個場係會與 TST 間帝廷皇宮好相似的, 但... 我去到灣仔果間帝廷皇宮, 根本同 TST 果間係兩碼子的裝修!!!

1. TST 果間個場係金色的, 金光閃閃; 但灣仔果間個場就好黃, 同我 D 姐妹裙撞晒色 (我揀了淺黃色來做姊妹裙的)... 我同小紀講, 我的姊妹如企在牆前影相, 她們就好似黏左在牆上...

2.  TST 果間的牆上和天花有好多宮廷油畫的; 但灣仔果間個場好寡, 一幅畫都無, 四幅牆都一模一樣... 我同小紀講, 即使企在酒樓裡的不同地方影相, 但根本一點分別都沒有, 因為背景都只是一片淺黃色的牆...

曹小姐可能都察覺到我無咩表情, 知道我唔係好鍾意個場, 所以她都不斷問我意見, 話可以講出來睇下可以點樣幫我... 果一刻, 我忍唔住喊左出黎!! 因為我實在係太唔鍾意個場喇, 我真係接受唔到!! 我喊得好犀利... 我好努力嘗試去接受間酒樓, 但我最後都只係識得不斷喊... 最後, 曹小姐話星期六 (19/9)﹑日 (20/9) 會有婚宴, 叫我地果兩日再上去睇下個場, 加左 D decorations 唔會唔好 D。 我地只好無奈地離開, 但我都已經知道我唔會在呢間酒樓擺酒的了...

其實之前我都有擔心過呢間酒樓的裝修和食物質素, 所以曾經有諗過轉場, 但後來爸爸媽媽話等它開張去試下菜先, 同埋我見 TST 新開果間皇室婚宴的裝修都 OK, 所以我就無再去諗轉場了。 但在果段考慮轉場的日子裡, 我發現原來 TST 有間御苑皇宴!! 其實我一開始就係想在 TST 呢個地區擺酒的, 但不是場地唔好, 就係圍數唔岩! 果時我都唔知有 "御苑皇宴" 呢間酒樓在 TST, 所以當初無去過睇場... 我都係前排想轉場時先發現它的, 上網看過它的 floor plan, 場地形狀和圍數都好岩我要求, 不過可惜打去查詢時, 22/11/09 已經無位了...

17/9 晚, 離開左灣仔合和果間帝廷皇宮, 我就同小紀講想落去 TST 間御苑皇宴睇場, 雖然我知道 22/11/09 無位, 但我寧願改日子/延期, 我都唔願意在灣仔呢間爛鬼酒樓擺!! 落到去 TST 間御苑皇宴, 唔可以講個場的裝修超靚, 但都唔差, 至少 D 佈置係我想要既野, 唔會好似皇上皇果 D 咁娘... 不過御苑皇宴既樓底比皇上皇的矮, 但我覺得都可以接受 (可能我唔高吧)! 個經理帶我行均全場, 我企上個 stage 度望返落台, 果種感覺, 同在皇上皇的係差好遠!! 雖然御苑皇宴並唔係一個令我歡喜到不得了的場, 但好多方面它確實比皇上皇好!! 我明白, 好多野好難十全十美, 無可能樣樣野都 fit 晒自己要求, 點都會有取捨, 但我寧願揀御苑皇宴都唔想要皇上皇間爛鬼酒樓, 不然我只會擺得唔開心...

唉... 好唔開心點解一開始發現唔到御苑皇宴呢間酒樓?! 浪費左好多時間...

我有再向御苑皇宴查問過 22/11/09 有無期, 咁當然都係無啦... 我本來都係打算延遲婚期的了, 不過個經理話 7/11/09 和 20/11/09 有位! 其實, 我係想揀 7/11 的, 因為係星期六, 星期六係最好的日子, 好多人唔駛返工/只返半晝, 可以早 D 到又可以玩夜 D... 但我有個在美國的阿姨, 已經拎左假 & book 左機票返來飲我果餐了, 她仲做左件靚衫黎飲我果餐, 又幫我整左 D 小禮物, 我真係唔想辜負她一番心意, 不然我就好衰女了! 最後我只好揀 20/11 星期五... 不過, 問題又來了:

1. 我有 3 位姊妹係同事來的, 依家由星期日改做星期五, 即係我的三位同事連我同本人, 共 4 位, 要在同一天請假... 唔知老闆會點諗 & 批唔批!

2. 所有涉及我婚禮既野都要 check 是否可以改期... 一大堆東西: 攝錄﹑禮服﹑MC﹑律師等等...

3. 小紀的阿爸阿媽又會依依哦哦... 因為他們好麻煩, 又傳統, 成日要呢樣要果樣...

最後我地叫御苑皇宴個經理幫我地 hold 住 7/11 和 20/11 呢兩個日子先, 因為我都想俾個機會皇上皇, 睇下 19/9 有人擺酒時加左 decorations 會唔會好 D, 會唔會都可以接受係番果度擺酒...