再一次更改我的婚宴場地 & 婚期

為左俾個機會自己 & 皇上皇集團, 我連同媽媽﹑小紀 & 兩位姐妹在 19/9 再去灣仔合和中心間帝廷皇宮睇場, 睇下加左 D decorations 會唔會可以接受到係番呢度擺酒。 因為我其實已經唔開心到六神無主, 我想 D 姐妹俾下意見, 睇下會唔會其實係我要求高, 還是間酒樓真係差到唔見得人!! 

結果係... 我媽媽 & 兩位姊妹都覺得個場唔得! 我果兩位姊妹一去到就已經彈到間酒樓一文不值... 我好 surprise, 因為她們係彈得仲勁過我!! 其中一位姊妹話, 當初聽我品評間酒樓時, 有諗過係咪真係咁差, 會唔會係我講得誇張左... 點知她依家親眼看過, 覺得呢間酒樓真係好差!!

講多無謂, 我地之後就落左去 TST 間御苑皇宴。 差唔多去到時, 我地打左個電話去問下會唔會有人擺酒, 方唔方便睇場。 他們果然係有婚宴, 不過由於時間尚早, 所以他們都好歡迎我地去睇場, 仲話可以實地睇到 D 佈置 (因為上次去傾時都只係睇電腦入面 D 相)。 我地去到, 他們已經列陣咁企在門口迎接我地, 雖然可能只係做樣, 但俾我地的 first impression 已經好好!! 我兩個姊妹去到時就已經覺得御苑皇宴唔錯, 同在灣仔合和中心間帝廷皇宮時的表現係兩碼子的事!! 個經理仲好樂意帶我地行均全場, 又即場試 D 燈光效果比我地睇!! 我唔係馬後炮, 其實御苑皇宴真係一間我一直想揾的酒樓!! 因為我一直就係想揾間酒樓的 decorations modern D (唔一定要好靚, OK 就已經可以, 最重要係唔好娘) 同埋可以玩燈光效果的!! 呢間御苑皇宴正正 provide 到我想要既野!! 唉... 我真係好唔開心 & 後悔, 點解一開始時唔做多 D research, 發現唔到呢間酒樓!!!

睇完場後, 我問返 D 姊妹 & 媽媽意見, 她們亦一致覺得御苑皇宴好好多!! 我其實都已經決定左揀御苑皇宴, 因為好多方面它都比皇上皇間爛鬼酒樓好!! 不過, 我地都係叫個經理再幫我地 hold 一 hold 個日子, 因為還是有一堆問題要 concern... 雖然我地都已經 check 左其他所有有關婚宴的 booking 都可以改期, 但:

1. 有 3 位姊妹係我同事, 要同老闆傾傾可唔可以批準俾她們 3 個同時請假

2. 唔知 20/11 果日子有無咩問題... 我屋企人就無意見, 因為我屋企唔迷信的; 係小紀的阿爸阿媽最麻煩, 又要好日又要呢樣果樣...

小紀果晚返去同左他爸媽講, 他阿媽話 20/11 唔係好日, 話 7/11 比 20/11 好! 雖然我都想 7/11 多 D, 但我真係唔想咁衰女辜負我阿姨的一番心意, 所以我堅持揀 20/11。 最後他阿媽話知小紀最近都唔開心, 所以都算了, 我地後生鍾意就得啦! 小紀亦安排在第二日 (20/9) 朝早同他們去御苑皇宴飲茶, 他倆老睇完個場都話唔錯, 仲即時問經理拎個菜單睇, 仲話要訂最貴果款菜式添!! 果一刻, 總算放下半舊心頭大石... 另外果半舊... 仲要等我星期一 (21/9) 返公司同我老闆傾姊妹放假的問題...

21/9... 我成朝都好緊張... 因為老闆娘返來我就要同她傾 3 位姊妹的問題! 因為我老闆娘好情緒化的, 好驚她一返來時心情唔靚... 唔知點同她傾好... 我又唔想拖太耐先傾, 因為我都要盡快覆御苑皇宴果邊, 我唔想有咩差池被人搶左個場!! 老闆娘約 11 點鐘回來, 見到她面黑黑... 有 D 擔心, 唔知點算好... 但後黎其中一個姊妹話剛與老闆娘接觸, 話她心情唔錯, 所以大約 11:45am 就走入去老闆娘房同她傾! 我無同老闆娘講話係場地問題要轉日子, 只係話私人理由要改, 搞到同時幾位員工要請假真係好唔好意思... 如果有咩問題, 我亦好樂意係扣我假而唔係扣我 D 姊妹假! 最後老闆娘都批準左!

傾完之後, 我馬上通知小紀, 叫他通知御苑皇宴我地 confirm 20/11 呢個日子, 叫個經理幫我地 hold 實個場, 我地當晚會落去俾訂!! 其實我恨不得馬上請半日假飛落去御苑皇宴俾訂!! 因為我真係好驚有咩差池搞到我無左個場... 個經理曾經講過一切已訂金為準, 雖然依家已經 9 月尾, 好少人會咁遲先黎 book 酒樓兩個月後擺酒... 但我咪就係其中一個囉!! 我好驚有人同我一樣, 同我爭 20/11 的日子!!

Lunch time 時, 我再打電話俾小紀, 想睇下他 call 左御苑皇宴未, 點知... 他又講左個令我好唔開心的消息... 我開頭以為我擔心的 "爭場地" 事件真係發生左, 點知原來個問題係他阿爸阿媽! 小紀話他阿爸剛打電話俾他, 話 20/11 日子唔好, 同小紀阿爸相沖喎!!! 我果下真係好嬲... 我嬲的原因唔係因為同他阿爸相沖, 而係在一年前揀日子時, 他阿媽話唔好揀 D 同我 & 小紀相沖的日子, 我果時明明就問過她要唔要睇埋會唔會同四大長老 & 爺爺嫲嫲相沖, 他阿媽話唔需要的, 點解今時今日卻用呢個理由同我講 20/11 呢個日子唔揀得???? 我叫小紀問清楚他阿媽, 點解一年前又話唔需要, 他阿媽竟然答: "我地屋企係以父親為先, 因為他做主婚人, 好多野都係他行先"! Come on!! 我完全接受唔到呢個咁荒謬的解釋!! 有咩理由他阿媽一年前會唔知 "要以父親為先", 係到今時今日先知??? 我覺得她呢個答案好唔 make sense!!!! 而且 19/9 晚時, 他阿媽查看通勝時, 就已經知道同咩生肖相沖架啦!! 點解果時又唔講, 依家先黎講??? 我的心情, 又再一次跌落谷底... 我在公司不由自主地喊左出黎... 我同我 D 姊妹 & 上司傾, 無一不覺得小紀的爸媽好過份, 覺得他們倆老好似玩野咁... 仲要係玩緊他們自己的親生仔!!

小紀過左黎接我放工, 我地繼續討論呢個問題... 我先知, 原來 lunch time 時他阿爸走左上去灣仔合和間帝廷皇宮, 他本人覺得個場好, 又覺得 22/11 個日子比 20/11 好, 所以就迫他唔好揀 20/11!! 我真係好討厭他屋企人!! 依家到底係我和小紀結婚定他阿爸本人結婚?! 他阿爸覺得個場好就要套落我度嗎??? 點解唔係我地鍾意而要係他鍾意???

我其實一直都好討厭 & 埋怨小紀的屋企人, 他阿媽成日催我地結婚, 我同小紀拍拖半年度, 他阿媽已經同我講結婚... 唔結又好似係我問題咁, 成日夾埋她 D 姐妹講說話俾我聽叫我結婚, 都痴線既! 想我地結婚, 就同我地講話唔擺酒都得, 咪旅行結婚囉! 好喇, 依家結婚啦, 決定擺酒啦, 她仲同我阿媽講話簡簡單單就得, 唔駛搞咁多野, 但她又堅持要揀好日! 要揀好日唔係一個問題, 問題係她又唔去揀, 只係掛住打牌!!! 拖左好耐, 要我發火, 小紀先捨得催他阿媽! 叫她揀 10 ~ 1 月 的好日, 她就只俾一個日子我地!!! 我真係被她吹漲!! 最火係小紀完全唔覺得有 D 咩問題, 照拎呢一個日子比我!! 我忍無可忍, 我同他講: "依家只係得你一家人結婚呀? 果一日你大晒呀? 所有酒樓留定位比你等你黎 book 呀?"

我真係好唔明, 他阿媽又要好日又要呢樣果樣, 要求多多就早 D 揀日子啦! 有咩理由 4 個月入面得果一日係好日子丫!! 咁唔想揀就唔好迫我地結婚啦!! 又要迫我地結婚, 又要揀好日, 又要求多多, 但日子又唔願揀只掛住打牌!! 所以我一直好怨恨小紀阿媽, 係她拖拖拉拉搞到 D 日子無晒的!! 依家轉日子 & 酒樓, 又五時花六時變, 今日話 OK, 聽日又話唔 OK, 仲要比個唔 make sense 的理由我!! 我完全係討厭他們倆老到極點!! 我同小紀講, 我真係連一聲老爺奶奶都唔想叫, 大婚果日, 完全唔想多謝他們倆老!

最後我同小紀講, 如果堅持唔揀得 20/11 的話, 就唔結婚了! 因為我係點都唔會再就他阿爸阿媽, 我唔會擺果間爛鬼酒樓!! 我唔知他阿媽係咪聽到小紀話唔結婚先知驚, 就叫我地照去馬改 20/11!! 於是我地就落去 TST 間御苑皇宴 book 左 20/11 了!

本來高高興興的, 而時間又緊迫, 所以 23/9 打算落去金都啦啦聲搞印帖! 點知當晚得知小紀阿爸又發顛!! 又係為左 20/11 呢個日子而依依哦哦... 講好多說話俾小紀聽! 又話因為相沖呀, 所以叫我果日唔好斟茶俾他們屋企人飲!! 話遲 D 揀返個好日先斟茶俾他們飲!! 把口就話同我商量睇下得唔得, 但實質呢 D 唔係叫商量, 係迫我要咁做!! 我真係火都黎, 呢 D 野你們又唔早 D 講, 我已經轉左日子 book 左酒樓喇, 你依家先黎同我講, 乜呢 D 叫做 "商量" 咩???!! 我當晚要播即日花絮, 你叫我點播呀? Skip 左入男家門果 part 呀? 定還是照播俾人睇, 等人地以為男家唔想認我呢位新抱, 唔願飲我杯茶呀?? 我真係好憎小紀屋企人! 一時一樣唔知他們想點! 今日同你講 A, 聽日又話要 B, 成家人都以為自己大晒! 小紀叫我就下他們或者改返 22/11 係果間爛鬼酒樓擺, 我唔肯! 我點樣都唔肯妥協!! 當初係他阿媽拖我時間而揀唔到個岩心水的日子, 搞到以後的事一躂糊塗, 我唔會再就他阿爸阿媽! NO MORE!!!

Even 我阿媽聽完小紀咁講, 都覺得唔斟茶好怪! 最後我只能夠退一步, 叫他們做戲扮飲茶俾我拍一拍個花絮, 等播出黎時唔好咁核突!! 如果咁都唔 OK 的話, sorry, 我唔結婚了!! 因為我係個好有主見的人, 我唔係他屋企要求果 D 要好傳統的潮洲小女人!! 我好清楚知道自己想要 D 咩野, 我唔會再就他們而迫自己揀 D 唔想要既野!! 當初就係因為他阿媽掛住打牌遲遲唔揀日子, 先搞到我的婚禮一躂糊塗!! 20/11 星期五其實都唔一個我好想要的日子 (我係想要 weekend), 但總好過擺灣仔果間爛鬼酒樓!! 他屋企咁多要求但當初又唔爹唔吊, 呢個係他們的問題! 如果扮飲茶都唔得的, 咁就唔好結婚啦!! 我唔會再讓步!!

我唔知小紀返到去屋企點同他阿爸阿媽講, 但最後他們倆老話我地開心就 OK 啦, 又話唔飲茶真係好怪, 所以果日我可以照斟茶俾他們飲, 只要他們兩個做 D 野迴避下就 OK! 喇... 又再一次講野一時一樣啦! 我聽完他們咁講, 我都唔知應該開心還是唔開心, 我真係好驚, 唔知他們幾時又發神經推翻他們所講既野, 又話呢樣唔得果樣唔得...!! 仲有, 希望結婚果日要順順利利添呀, touchwood 講句, 如果果日他男家有邊位頭暈身慶, 又入我數呀!!

雖然我最後係轉到日子 & 場地﹑新場地比灣仔間爛鬼酒樓靚﹑ 又可以照入門斟茶﹑ 我果位在美國的阿姨又可以照黎飲我果餐, 但其實我已經無左結婚果種喜悅... 因為呢一年里面, 真係有好多不如意的事情發生... 影婚紗相﹑酒席﹑姊妹... 樣樣都有問題, 樣樣都搞到我好唔開心!! 最難受既係... 每次有問題發生都會令我好唔開心, 而當個問題解決左後, 我開心返, 但跟住又會再有問題發生令我的心情跌返落谷底... 呢個情況係不斷又不斷發生, 我的心情就成日處於起伏不定的狀態... 我覺得好辛苦...!! 有時我都會諗, 其實個天係咪叫我唔好結婚呢...?