日本之旅@Day 8_富良野篇

第八日就係成個旅程最特別o既一日，點解? 因為呢日我地去左富良野，富良野o既環境真係好靚、好舒服，眼前只會見到一片片o既農田、花田、好精緻o既木屋仔、好 raw o既火車站......可能是看厭了香港一座座的高樓大廈，滿街的污煙障氣，反而很喜歡這裡的舒適寧靜呢~

因為火車班次太疏，我地o係路軌都可以慢慢玩~

今次o既旅行，雖然出發前我地都有睇下旅遊書，大概 plan 下我地o既行程，但係講真對於今次o既旅行，去邊度玩，去得多唔多景點只係其次，能夠有一次只有我地兩個人o既旅行，真正屬於我地兩個人o既空間才是最珍貴的呢! 所以黎到富良野呢個咁舒服o既地方，真係咩都唔玩，只係隨便欣賞下眼前o既風景都已經覺得好享受，畢竟好耐都未試過可以咁放鬆.........

o係富良野呢一晚我地 book 左一間 cottage，宿主先生好好人，一早到火車站接左我地仲幫我地拎左d 行李返 cottage先，而我地第一站就去左遊客必到o既景點--富田農場喇~ 不過，真係有d失望，8 月頭o既薰衣草田已經好似苦草咁，真係同旅遊書介紹o既相好大出入呢~ 好難先搵到比較鮮艷同靚o既花影下相，仲要係就哂角度先影得好似好多花咁咋，不過影出黎都呃得下人喎, Hee.......

呢張就係o係富田農場影的，但係呢塊只係一塊普普通通的花田，富田農場咁多遊客，但係都沒人黎呢幅田影相呢~

離開富田農場，我地就去左附近一個公營o既花田，有山兜坐上山，o係山上可以見到整個富良野同美瑛，真係好靚呀!!! 好似睇韓劇我的野蠻女友男女主角成日上去o個個山o既風景一樣，眼前o既畫面真係好似一幅畫咁，我同倫少就係咁坐o係度睇下風景，唔覺唔覺都坐左好耐呢! 之後一路行落山，我地就 set 左個腳架一路影，好難得呢度冇人，只有我地兩個，所以我地真係好 free 咁係咁影, 個腳架拎左咁多日終於可以大派用場呢, 哈哈~

因為冇咩人，可以 SET 個腳架影背面都唔驚俾人拎左個相機~ 哈

呢度真係好 free 架, 我地玩到"背"住黎影 tim~ Heeeee

呢度係美馬牛 Kanno Farm, d 花幾靚呢~ Wow, 日日都可以咁就好了!!!

好鍾意呢張，好似一幅畫~

之後番到 cottage，宿主先生知道我地係香港黎，就好熱情咁俾我地睇楊千嬅同古天樂6年前黎呢度拍音樂特輯時o既簽名相，真係估唔到佢地黎過呢度喎, 我地 book 呢間 cottage 只係倫少咁岩o係網上搵到，forum 其實都冇咩人提過，我地去之前仲擔心冇咩人去過唔知好唔好，而且我地知道o個度係冇冷氣的呢，真係幾擔心呢晚會熱到訓唔著~ 點知黎到呢到，真係又一次意外驚喜，環境佈置得好靚，好 artistic 呢，怪不得楊千嬅都黎呢度拍特輯呢!!! 哈哈~

千嬅同古仔o既簽名~

食完一餐好好味o既黑咖喱晚餐之後，我地就o係木屋仔前面o既空地玩煙花，真係好耐都未試過咁開心....咁浪漫呢! 玩下玩下仲學人地影結婚相咁整個心黎影相 (因為之前影結婚相時我地冇影呢d，原因係通常影煙花o既相都影得個人好細粒，又睇唔清楚個樣，結婚相咁貴一張，唔抵嘛，哈哈)，不過都唔易呢，最後都只係影到一張好似蘋果咁，個樣仲濛左 tim~ 玩完煙花要番入屋時就發現......弊喇.....個門口有好多飛蛾飛黎飛去，我地間屋又開住燈，一開門????..........走左成屋飛蛾入去我地就唔使訓喇!!!!!! 結果我地o係門口搞左好耐，一個掩護一個開門，首先我入左屋先，剩低倫少一個o係出面俾飛蛾嗡住先......哈哈~ 睇準時機倫少先一個閃身衝入黎......haha......緊要關頭都係要女仔行先喇~~~

呢一日真係可以話係完美的一天呢!!!

心心變左蘋果.......:(

"T for Tracy, L for Lun"..............

第二朝食完早餐，宿主一家人原來有一本遊客留言冊，打開一睇，原來好多香港人都黎過呢度呢，仲好多都係黎 honeymoon tim，有好多人仲係黎過幾次喇，其實呢度咁舒服咁靚，我同倫少都想第時再黎呢!!! 不過最估唔到，就係倫少都拎起枝筆寫留言喎，好少有呢!!!!!! 連個留言我地都影左相，驚唔記得自己寫過咩嘛，哈~

希望唔使好耐我地可以再黎啦!!!