第一次"雪芳"

睇到個標題, 一定知道我就係做出人生第一次既雪芳, 即係戚風蛋糕!

其實我好鍾意成日blog遊, 特別係當我想整野食既時候, 因為好多blogger都係整蛋糕高手, 每次想整咩都可以係d blogger度偷師! 而家好多次都成功! 真係好開心! 話說就係blog遊既時候睇到好多blogger勁愛整戚風! 我又真係唔知箇中有咩奧妙之處呢, 所以一直都好想試, 但我想整得正宗一d, 所以成日都想去買一個中空模, 但成日淨係見到中空既水泡模, 由於我見blogger用既都係直身既中空模, 同埋我想買個7吋既, 所以遲遲都未買。

直到琴日, 難得早收工, 就諗住再去睇下啦, 我係旺角某上樓店諗住買既時候, 咁啱佢又冇晒7吋, 6吋又太細, 8吋又太大, 咁點好呢?! 點知佢就介紹我買中空錫紙模黎用, 佢話既然我係第一次整, 可以用呢d試下先, 如果真係好有興趣先買個, 咁我都覺得啱既, 間屋又唔係大, 我又成日買咁多野, 真係冇咩位放! 所以呢我就買左個錫紙黎玩住先啦! 好喇, 睇下我既制成品啦!

嘩~~~升高升高d啦

剛剛出爐

切開左喇!!!

食後感: 其實我都唔知點樣先叫做好! 但我今次整既檸檬戚風, 我就覺得唔夠檸檬味, 因為我淨係落左1個檸檬汁, 可能就係咁唔夠咪, 而質感就有d濕潤咁, 唔係話好乾既, 都幾彈, 但又唔夠鬆軟! 唔知有冇blogger可以指點下呢? 點樣既質感先至啱呢???

食譜: (我都唔記得左係邊個blogger度搵番黎, 真係唔好意思)

檸檬戚風蛋糕（17cm戚風模）

蛋黃              3 個

蛋白              4 個

低筋麵粉          80 克

菜油              40 克

砂糖              60 克

檸檬汁            45 克

水                15 克

檸檬皮茸　　　　　半個 (我無加)

1.    將 20 克砂糖與蛋黃用“蛋發”攪至砂糖溶解。

2.    依序逐少加入菜油﹑水﹑檸檬汁拌勻（每加一樣材料都要拌勻才可加另一

     樣）。

3.     加入已過篩低筋麵粉拌至光滑柔潤。

4.     將蛋白和剩餘的砂糖打至硬性發泡。

5.     取1/3 蛋白加入蛋黃糊內拌勻，再加入剩餘的蛋白霜內用刮刀拌勻。

6.     將麵糊從稍高處一口氣倒入模內，用兩手提起模型輕敲一下。放入已預熱

      180℃ 焗爐焗 30 分鐘，出爐後馬上倒扣放涼。