雲南自由行後感

今次o既旅程非常順利呀!除o左係出發o既時候，班機Delay o左一個鐘、返o黎o既時候，等行李等o左好耐好耐、同埋出發之前o果晚，老公部電腦有問題(後o黎搞番好呀！)之外，一切順利哩！所有o既行程都係o係預計之內，而且仲額外去多o左地方，相信旅遊黑仔菌應該離開o左我o地嘞！

出發之前，上網check過，當地天氣麻麻地，預計係天陰陰有霧。點知意外地，我o地去o甘多日，o甘多日天氣都好好，個天好藍，只係臨走o果日，天氣突然轉冷，天好陰，不過都走，唔緊要嘞！我真係覺得我o地好好彩哩！

雲南確實係一個好靚，好值得去o既地方，大景點o既配套都做得唔錯，只係交通唔方便，有待改善呀！今次旅程最失望o既景點，應該係玉龍雪山嘞！叫得雪山，應該可以見到雪呀！可惜上到去，雪已經所餘無幾，石反而滿山都見得到哩！全球暖化，天氣越o黎越熱，真係越o黎越嚴重，有一日，可能會再無冬天嘞！

今次一次過去o左三個古城，大理古城、束河古鎮、大研古鎮，喜歡寧靜o既我，當然最鍾意束河啦！相比起另外兩個古城，束河比較寧靜簡樸，不過其實束河都開始有D商業味道，只係無o甘濃呀！而我最唔鍾意o既，就係聞名中外o既大研古鎮，古鎮原本就應該係要簡樸，但係大研除o左商業味濃之外，最令人討厭o既就係o果條酒吧街，又嘈又雜又混亂，完全不知所謂，同古城根本就格格不入哩！

無去過真係唔知，原來昆明都頗先進呀！國內o既人越o黎越富有，消費得起o既大有人在。睇番香港，好似越o黎越退步o甘，樣樣慢人幾廿拍，真係好擔心再過多十年八年，國內o既大城市會追過香港哩！我o地o既政府幾時先會醒覺呀！