上左兩個月結他堂，今日係第三個月既頭一堂，亦係我第一次攞個結他去既第一堂。屋企有兩支結他，一支魚絲，一支鋼線，都唔係自己既，一直都唔想攞支結他上堂，自己都唔明點解。
今日攞既係鋼線。出奇咁早到，係個房都自己練。
老師一見我就笑笑口，唔知係咪見到我洗完頭唔gel野既樣而失笑[實情係冇咁多人得閒注視我]。
學結他，好貴，$120/0.5h，係家陣風頭火勢之下，我好唔捨得，但又因為係音樂可以令我開心，所以都照交住學費。
我諗老師同我差唔多大卦[自己都唔細囉]，係約兩堂之後就大約建立到個默契，好開心，雖然佢好多野講。
老師一直都知道我失業。
今日仍然係教彈十七妹既「始終一天」，隻歌教左兩個月我都未彈得熟。老師次次都要突登執我中段既chord：
我也不再在意我應該得到幾多
忘掉你 揭了瘡疤 心魔放開老師話我要畀d力水，呢處個轉接位係高潮。佢見我彈到冇里神氣，話要加d堅持信心，好好彈好佢。之後我好大力咁彈，即刻就用錯力，重甩beat，可謂衰多兩錢！
最後，老師問我搵工既進度，叫我試下每日祈禱；佢話：「你彈得好呢隻歌，就代表有返信心！」
老師，雖然我唔信教，同你又唔係熟，但係對於你教結他兼心理鼓勵，令我感動，希望自己都爭下氣。
