網誌分類：未分類 |
圖片
網誌日期：2009-11-27 18:50
第一次睇阿邦嘅live show，喺個細場度搞，唔錯，起碼感覺親密啲。
成個演唱會得三部琴同埋藍奕邦本人，概念幾似《一峰一人一結他》，簡單直接，無華麗嘅包裝，有嘅只得阿邦嘅音樂，simple is the best!
鍾意阿邦嘅歌，可能就好似佢所講嘅「星期五的安靜」，就係當中嘅沉溺吸引到我，而鋼琴，的確係好可以將嗰種感覺帶出嚟。《成長》、《流星月台》、《不是我的不我要》、《六月》甚至《善忘》，就算純音樂都好好聽，個琴聲的確令人起雞皮...
不過今日覺得阿邦係有啲失準，《賴床》個感覺好似琴有琴彈，人有人唱，好似拖住拖住咁，去到《學神》都有類似感覺。
《奇珍異獸》唱到最後果幾吓「喔噢」唔知點解覺得好性感好誘惑，仲刺激過明刀明槍嘅《含蓄》。
唔知呢個《88+1音樂會》會唔會好似《一峰一人一結他》咁，變成不定期嘅演出系列呢？不過下次唔該轉場，呢個場係close，不過唔太似一個做show嘅場，而且冷氣太凍喇，吹到頭都痛埋。不過都唔好star hall喎，唔好坐呀！
p.s.文中先後提咗兩次一峰，因為一路都覺得佢哋嘅路差唔多，但今晚睇完，我發覺唔應該將佢兩個做比較，因為完全係兩回事，各有各特點！
