被騙了 - 曼谷之旅Day 3

2009年7月20日   晴

今日往大皇宮出發，要搭船先去到架...

落船lu......

成日都見到呢款巴士，我覺得佢好得意，同埋架架都唔閂車門架！

0係大皇宮外圍行左大半個圈，一路都搵唔到個入口，沿途見到好多遊客個樣都好迷惘，當然我地都唔例外...

行行下有人埋嚟搭訕，話俾我地知大皇宮今日有慶典，要下晝兩點先開，但係當時只係12點幾咋，嗰位叔叔就提意我地搭「督督」去其他景點行下，夠鐘先再返嚟，仲話只係40泰幣only，我地見橫掂唔貴又要kill time，是旦啦，咁就上咗車喇。

第一站佢車咗我哋去間無遊客會去嘅廟，咁啱喺入面有個人係咁同我哋傾偈，又問我哋將會去邊，我哋show俾佢睇係去一個賣珠寶嘅地方，佢就話我哋好lucky，話嗰度一年只有一個星期開放做零售，而且價錢好平，for套現都好喎。

離開間廟再上車，佢就車咗我哋去嗰間珠寶店，一去到就知係旅行團經常會帶人去嗰啲shop啦，完全唔吸引，兩分鐘飛返出嚟。呢個時候司機哥哥同我哋講話帶我哋去下一站之前，會車我哋去另一個賣珠寶嘅地方，我哋只要入去行個圈，就可以幫佢換到入油coupon喎，但係我哋真係唔想去囉，叫佢車返我哋返皇宮，佢都唔肯，仲拎埋車匙落車，well，我哋咪跟住落車，俾左$40佢，跟住喺佢面前搭的士走，講真我哋覺得被要脅囉，上車前又話$40就ok，點知去到中途又咁樣，點知呢次順你意，跟住會係點架！

返到皇宮嗰邊，又有個大學生埋嚟，話我哋知皇宮當日全日只俾泰國人入，遊客唔入得，跟住又問我哋會去邊度玩，原來佢同頭先個叔叔一樣，都係想sell我哋去某啲地方，我哋話去咗就算，咁啱有其他遊客埋嚟，佢就轉移目標喇！

諗住再搵入口，點知行行下有警察封路，好似話泰皇出入喎。我哋都行到無晒mood，決定返歸算數！

去咗酒店對面個商場搵食，每個人都有張卡，紀錄你買咗啲咩，離開先一次過俾錢...

食完就係自由活動shopping時間，我又唔太好shopping，喺個商場行咗個幾鐘已經想走，咁啱撞到亨哥哥同旭少，大家都買咗嘢，決定先返酒店休息，再等Emily返嚟。

等到Emily返嚟，佢同旭少都好似意猶未盡咁，我哋又唔係好餓，所以佢兩個再去shopping，我同亨哥哥喺房休息，嗰個幾鐘真係好好瞓！

九點幾十點先出發去食飯，我哋諗住去食海南雞飯，落樓下搭的士啦，俾本書個哥仔睇，佢同我哋講話間舖逢星期一休息，仲問我哋去唔去食海鮮，經過晏晝一役，我哋都唔信佢講嘢囉，自己行開搵的士搭。上咗的士我覺得兜咗個大圈，到佢停車我哋先知原來間舖就喺酒店附近，行7分鐘就到.....算啦，起碼都叫車到過嚟...

呢個雞飯真係幾好食，個苦瓜排骨湯都好好飲，食完一碟飯唔夠，我仲嗌多碟添呀！