血拼 - 東京之旅 Day 7+8

10月4日  晴

之前一晚成11點半先返到池袋，攰死咗！今朝又訓到十點先肯起身，行去食早餐途中，見到呢架好可愛嘅車仔，真係行得架！

早餐揀咗嚟無敵家食拉麵

我呢個麵係湯另上架，等個麵可以保持硬度，更有口感，非常大碗，食完飽到癲呀！

去便利店買咗兩樣嘢飲，枝午後紅茶好好味，就算唔凍都好飲，喺香港見到，早幾日喺油站賣$12，今日7仔見賣緊$17.9...黐線！

隔離嗰枝乳酸三年前試過架喇，又係好好像嘅呢！

食飽飽就起程，今日見無乜地方好想去，Joseph竟然話去行outlet，無諗過佢會有呢個提議囉...

揀咗去入間個outlet

唔覺唔覺喺裡面都行咗三個鐘，都買咗唔少嘢架，我買咗兩對鞋，佢買咗一對鞋+兩件tee，唔算貴貨色又ok喎...

回程去咗新宿，真係夜晚先去到新宿架，日光日白最多都只係經過，唔會停留，奇怪...

有啲肚餓喇，朝早食完個麵都無食過嘢，去老麥買咗個薯仔批，好味！

JR站外的中華拉麵檔

其實去新宿，只係想去二町目條member街行下，今次去比三年前少咗啲舖頭喎，不過其實無乜嘢睇...

行完就返池袋喇，去Pepper Lunch醫肚，嗰陣都成十點半喇...

返到酒店影下啲戰利品，呢兩對鞋就係喺outlet買架喇，都係港幣$3xx一對咋！

宵夜...

10月5日  晴

今日終於要回港喇，朝早5點起身梳洗出發，因為搭0955機呢...

飛返香港途中有個小插曲，說話飛咗一個鐘之外，有廣播話機上有人唔舒服，最後要轉飛鹿兒島放低個乘客，就係咁搞一搞就delay咗兩個鐘喇，希望個乘客最後無事啦！

返到香港同Joseph食啲嘢，跟住佢就拖埋件行李返工，我就返歸喇。

8日嘅東京之旅就咁完咗，不過都夠囉，今年飛咗四次，啲假都俾我用晒囉...