奇蹟...... 感恩

之前, 爸爸見完醫生, 講關一大輪治療組合, 發現最有效最少副作用嘅標靶治療竟然萬幾蚊一支, 如果加埋化療組合, 成個療程保守估計大約要30萬. 呢個數目對我地嚟講, 實在係由鞭長莫及.  由於能力有限, 爸媽決定先食半年口服藥, 之後再加化療. 不竟呢場係長遠戰, 期間仲有好多好多使費, 爸爸也要為媽咪將來打算, 所以都唔點諗標靶治療啦.

當日返醫院諗住同醫生confirm揀咩組合, 醫生竟然話想邀請爸爸參加瑪麗醫院同香港大學嘅一項標靶治療+化療嘅研究, 標靶果part係 "免費".  冇錯! 係免費呀!  我地凈係需要俾大約6萬蚊嘅12針化療費用.  而呢隻新標靶藥, 暫時係最靚同最貴呀, 要5萬蚊一針. 個研究係希望拎多d實案數據, 對醫治大腸癌有幫助.  醫生話唔係要爸爸做白老鼠, 隻藥已經經衛生署認可咗, 係市面已經用緊架啦!

果刻真係覺得係一個奇蹟, 其實每個大腸癌病人都有機會被邀請, 但被邀請者一定要pass好幾個要求先可以參加, 例如病人基因冇變, 所有驗血報告出現正常情況, 病人唔可以有任何長期病......等等, 雖然醫生指出標靶唔會令末期病人完全康復, 但可以控制腫瘤生長, 有機會令細嘅癌細胞消失, 大嘅腫瘤則有機會縮細3-5成.

爸爸噚日入院開始第一次治療, 我地正式開戰啦!  希望天上再給我地一個奇蹟, 爸爸能打贏呢場仗.