無明火 三千起

爸爸今次病, 令我覺得香港嘅醫療制度真係令人感到幾無助. 

首先, 我地比較唔好彩, 喺瑪嘉烈遇上一個冇咩經驗嘅新仔醫生, 爸爸無故發燒超過一星期, 佢俾到我地嘅訊息係一般流感, 佢地有腸胃科醫生摸到爸爸腹部有嚿嘢, 提議順勢排個期幫爸爸做電腦掃瞄, 但就要出年1月先有得做, 完全冇警覺事態嚴重, 俾病人一個選擇就係去私家做.  因為政府醫院病症多, 如果病人心急想知咩結果而經濟能力ok嘅話, 其實佢可以寫紙俾我地出去做, 私家自動會收七折, 呢d都係我地之後睇私家時, 個醫生話俾我地聽先知咋. 

之後得到好友嘅幫忙, 有機會轉去瑪麗醫院, 於是要求瑪嘉烈寫轉介信, 點鬼知一時又話跟開嘅醫生冇做; 一時又話要等12月覆診見咗醫生先, 本來想心平氣和尋求解決方法, 終於真係頂唔順, 攪到我發火問佢係咪我爸爸有事時, 佢地負責任? 跟住先搵返佢話冇做嘅陳醫生出信俾我地.  因為知道我地轉去瑪麗, 個陳醫生仲打俾我同我講爸爸8月入院時, 情況唔係太差......, 話宜家可以因應病情即收我地入院, 同盡快安排做掃瞄. 由原本出年一月提早到下個禮拜四

但經考慮後, 已經對瑪嘉烈信心不大, 加上瑪麗醫院果邊話晒係腫瘤專科, 我諗d醫生都professional d呀! 

我明白普羅市民有病冇錢就係要等, 但問題係醫生冇俾過選擇權我地, 唔通我地個樣真係似窮到幾仟蚊都拎唔出 加上佢經驗唔夠, 完全唔aware到病情嘅嚴重性.  雖然呢一刻仲未知道爸爸係咩事, 但呢個醫生已經令我地錯過咗好多寶貴嘅時間.

我姪女話食夠天空中嘅100隻飛機就可以願望成真, 我宜家每朝返工都唔係巴士瞓覺, 望住個天等食飛機, 直至今日為止已經食咗50啦! 由於時間緊迫, 容許我嘅願望成真先呀, 果50隻會盡快架啦!