更上一層樓

表姐老細間豪宅裝修咗成大半年, 終於大功告成, 噚日收工, 成班同事一齊去咗參觀兼打邊爐. 

去到門口落地玻璃, 凈係見到地下果層已經嘩嘩聲, 之後表姐好似做咗"更上一層樓"主持人咁帶我地成班平民百姓逐層去參觀.  雖然裝修絕稱不上豪華, 但以簡約為主, 全屋以白灰色為主, 感覺好舒服.  加上燈飾同佈置上好靚, 睇得出花咗好多心思. 全屋地下連天台其4層, 總共7間套房, 各自有自己嘅洗手間, 同埋電視+電腦, 真係方便到暈.  除咗食飯, 我諗都唔點使出房門呀!  之後攪到d同事個個好都話好想裝修屋企

我地成班人好似大鄉里咁, 嘩! 呢樣靚.  嘩! 果樣靚. 喺邊度買? 幾多錢?  之後表姐叫我地一人揀一樣, 送俾我地.  因為佢全屋d燈飾同佈置同浴室用具......大部份嘢都係喺大陸買呀!  但真係估唔到大陸d嘢會咁靚, 而且價錢又平喎, 表姐講香港好多裝修設計公司都係喺大陸攞貨架咋. 

講返呀雖則佢話d嘢唔貴, 送我地一人一樣, 但我地都唔會咁狼嘅, 都係揀d平嘢咋, 我就揀咗兩盞波波燈, 市價賣大約HK$400, 表姐話佢攞大約HK$170, 覺得幾得意幾靚, 諗住喺玄關位用.  不過之後表姐又俾咗幾樣我, 有一盆假花嘅小擺設 / 香薰 / 紙巾套同枱墊.  我地成班人又食又拎.  玩到11點幾就歸家啦, 表姐話等天氣涼d先再約我地喺天台BBQ.