努力修補中的關係

有一日，我問老公：你個妹幾時生日。佢就話： 4月 X 日。

然後我就叫佢問下細妹，今年想要乜，佢竟然扮傻問都無問。

唉......我唯有發揮我個小小記憶體 ( 豬腦 )，估佢細妹鍾意乜野，

最初我想送個 Monchhichi 公仔俾佢，但又諗下，佢都超過 20 歲啦，

仲玩唔玩公仔架？所以最後都係買 Agnes B 俾佢好，襯番大個女身份嘛，

我同老公講，話送 Agnes B 電話繩俾細妹，老公就話唔好，但我又諗唔到送咩，

所以最後都無理老公，決定買電話繩俾佢啦！我好想知 Helen 收到開唔開心，

老公就話：佢有用。之後我收到兩個 SMS，係 Helen send 俾我既，

話多謝份禮物，但我總係覺得，係老公迫個妹 send 俾我，

或者係 偷偷地用佢細妹部電話 send 俾我，因為我有

回覆 Helen ，但我覆落佢 MSN 度，而佢就算上網，竟然無再講任何野，

我就感覺好古怪啦，而佢既堂兄弟姊妹都係夾份送 一個 Agnes B 

蛋糕俾佢咋，佢就開心到飛起，我個份禮物，當然提都唔提下啦，

算數啦！人就係咁。

其實買既時候我都有諗，買唔買好呢？？因為真係同 Helen 唔多熟，

見過幾次面，勁少傾計，佢仲對我&亞女唔好，點解我咁白癡，要左諗右諗

咁送生日禮物俾佢，又唔見佢送野俾我&亞女，我地開心。

不過算數啦！都慣左無人關心我.......

之前為左想同老公既父母搞番好關係，新年個陣主動買禮物送俾佢屋企人，

而最後回敬既答案係...........空氣 ( 多謝都無句 )，嘩！個心死晒囉，點止灰，

簡直黑添啊！我諗極都唔明，點解同人唔同命，出面女仔貪名牌，扮高貴，

白鴿眼，購物狂，鍾意碌爆男仔信用卡，化勁恐怖既妝出街，跟風勁過蒲公

英，都仲有咁多人錫，咁多人讚。

我越黎越覺得，自己唔係地球人，點解咁得意，同佢地都唔一樣既？

有人話：女人小氣........我認，但我有樣野好，就係容易心軟，容易，每當唔開

心既時候，我會喊完就算數，每當人地對我唔好，我會好容易原諒人，但原來

好心地既人，係地球上好難生存架，總會有好多人，鍾意聯群結黨咁欺負呢類

人。我直到依家，都唔想改變成為地球人，因為我仍然覺得，佢地無野值得我去

學習。