聖誕大餐勞作比賽

今年學校搞個聖誕大餐勞作比賽，我同老公都好俾心機去做，因為之前既母親節、父親節、中秋節都輸晒，我憑著唔想再輸既心情下，好努力去做，可惜.......都輸埋！

完全因為老公流灘，交行貨！

其實做勞作既過程中我睇得出，佢有俾心機去搵材料，但唔知點解到做個陣，就奇奇怪怪咁囉。

我地設計係個錫紙盆放上隻火雞 ( 盆同火雞由老公整 )，再加西蘭花、甘旬、聖誕樹、薑餅等等 ( 由我整 ) 伴邊點綴下，本來會好靚架。

但老公個盆大，隻火雞太細，搞到我西蘭花等等配菜都唔可以整得太大，一隻無營養既瘦雞，搞到成個作品差晒囉！仲要到第二日交勞作個陣，隻雞皮收水喎，起晒龜裂，衰晒啦！衰晒啦！

最初諗住搏一搏，有無獎啦，點知真係無囉！

今日係幼稚園搞聖誕節聯歡日，我見到其他小朋友既作品，真係好靚架，夠大，夠靚，有晒棉花、聖誕樹、雪人等等。

我終於明白獎秘訣啦！總之有幾大，整幾大，包有獎。