人生無常

今朝打電話返公司問 Order 時,

聽到個好 "沉重" 嘅消息,

原來尋晚 "蓮花港" 雙體船撞船意外死咗嘅荷蘭人係我嘅客,

仲記得尋日朝十點幾响中港城接佢哋嗰陣,

個個都笑容滿面......開開心心嚟遊香港!

又有邊個會估到回程時會發生意外!

今晚睇新聞時.......電視有小小片段影到個荷蘭伯伯托住頭好憂心嘅樣,

我一眼就認出他......第一個同太太响禁區行出嚟同我 Say Hello !

佢太太仲話我好 Young......問我係咪得 22、23 歲!

究竟佢太太係受咗傷定已經走咗.......我都唔知!

因為我而家都聯絡唔到領隊同班客,

香港 Agent 亦冇消息!

雖然只係同佢哋相處咗半日,

但發生o甘不幸嘅意外,

我聽到都覺得好唔開心!

雖知道意外意外......永遠係意料之外!

亦明白發生咗嘅事係唔可以改變,

但心總有 D "戚戚然" 嘅感覺!

人生無常.......珍惜眼前人!