留心....針?!

腳患未癒, 乖乖地去睇醫生繼續俾針拮...

呢日無乜人, 拮完等抆之際, 有客到...醫師去咗隔離房招呼另一個病人。

夠鐘, 醫生遙控阿姑娘幫我抆針....

原本都無乜特別, 之前姑娘都有幫手....不過今次有D唔同....

每次落針, 由於我呢個病人伏响床無嘢做, 所以會好專心感受落針位置, 順便數一數: 腳板底三枝, 膝頭側邊每邊一枝, hip側邊又兩枝, 背脊五枝....

針...係醫生落嘅, 不過穴位次次都有D唔同。抆個吓由姑娘嚟, 唔留心搵吓, 好易出事...

先抆腳板, 抆完仲要立即...係呀, 醫生响隔離遙控, 要"立即"吸腳板...但佢講時個幾枝針已經俾姑娘抆走咗..."立即"唔到...(我懷疑所有上司都係要求下屬"即刻"做到佢要求嘅~)

跟住...膝頭側邊...數住...clear...再上...咦...得一枝嘅唔通我數錯? 姑娘仲"立即"幫我整理好d衫。再上再上...背脊好快抆完, 數唔切~~

吸腳之際, 依然唔放心, 自己伸手去檢查一下...結果, 真係俾我搵到一枝...响褲頭...

不過我無出聲, 咁就可以keep住枝針....

正想去第二間房俾阿醫生拉筋按背...起身, 背脊痛...平時抆完無痛得咁緊要架喎...嘿...

我: 醫生, 我背脊好似仲有枝針未抆...(同時喇高背脊D衫....)

醫生: 睇吓...無呀....係喎...枝針拮成日效果會好顯注架喎...唔得架...(最尾個兩句明顯地係同姑娘講, 姑娘"立即"擰轉面逃之夭夭....呢吓又咁快~)

嘩...好彩我背脊仲有感覺。如果唔係俾阿醫生"禁"落嚟, 枝針入肉七分...或者十分...死得!!