難以言喻的第一次

右腳腳踝多年來受傷拗柴無數次, 已經習以為常。

早幾個月似乎嚴重咗, 只係坐咗個幾鐘之後企起身...咁就拉傷咗。睇完跌打又好似無乜幫助, 結果都係以我一貫嘅方法處理...行得走得就不了了之。點知上個月開始行路開始腳踭痛, 傷開嘅位亦有...唔順暢嘅感覺。

上網search咗一輪又週圍問人, 最後決定去師母介紹嘅一位骨傷科醫師度睇。但大前提係: 你針唔針得?? 答案係...唔知噃, 未試過喎~~

上到去, 未到我, 等叫名之時偷聽隔離一家三口講嘢, 主要都係講吓阿女D同學嘅是非啦, 譬如甲同學話要去識三太個女何XX咁。三太...何生嗰位喎, wow~~呢位醫師d病人都幾...哈~

到我喇, 醫師睇咗我對腳幾眼, 就吩咐姑娘預備針, 話要由腰開始針到落腳....踭。個人本身非常容易緊張嘅我聽到已經驚一驚...為免真係針落時唔知有咩自然反應嚇親人, 唯有响佢表明我未試過, 希望唔好嚇親佢。咁其實佢都好好人, 知道之後不斷講嘢企圖分散我注意力。不過, 要知道聽覺同感覺我都分得好清楚, 我把口識應佢之餘我依然清楚知道佢隻手high到我d肉...成個人緊哂...仲有嘅自然反應係...隻腳踢咗一下~~

不過, 佢落針快, 基本上我唔覺得有針吉, 只係知佢隻手去到唔同位置。完成, 我諗大概有十幾支針吉住咗, 立時變為人肉針包。幾分鐘後, 條腰好重, 應該得三支針响呢個位, 但好似有十幾斤重.....然後諗起n年前學手力急救時miss話穴位被刺激後嘅反應: 痠, 麻, 脹, 痺 & 沉重....原來真係好重架~~

過咗一陣, 我估醫師見我唔郁, 入嚟試吓我係咪C咗...試嘅方法係, 搵幾支針嚟鑽吓。當聽到幾聲慘叫之後, 佢好滿意咁話: 好!仲有感覺, 好多年紀大個D都退化到無感覺架喇! (我諗我未屬於個批呀~~)

夠鐘, 醫師又吩咐姑娘準備拔罐....吓!! 呢樣無人預告我知喎...不過都無得反抗啦, 仲吉住D針架...唉...又痛過...不過, 感覺比鑽針時良好得多~~

好快又要再睇第二次....今日開始緊張定先~