可愛的同事

P小姐

一天上午, 我有一份件要寄courier。預備好後立即交P小姐處理, 因為已差不多到截件時間。放低後, 我順路入廁所辦事, 無返位。

剛剛坐低(响廁所入面), 聽到外面傳來急速嘅高跟鞋腳步聲, 原來係P小姐。

P小姐: 係咪XXX呀??你份件俾邊個收呀?

我以一把充滿感激嘅聲音笑住咁答: 俾潘小姐架…唔該你!!

好彩你咁快搵到我, 過多兩分鐘可能就用唔到呢把聲架喇~~

J小姐

一天早上, 買咗三文治當午餐, 我將佢放入雪櫃最入面。Lunch到, 但發現份三文治唔見咗。正當十個疑惑, 自言自語問緊去咗邊嘅時候, 企响隔離洗緊杯嘅J小姐大叫…

J小姐: 哎呀…份三文治原來係你架????

我: 吓…你食咗呀?

J小姐: 唔係…我今朝掉咗呀~~我以為係我早幾日買返嚟無食到…

我: 吓!!!!!

J小姐: 我見個膠袋一樣…又係我平時食開個款….我俾返錢你吖…唔好意思呀….

我: 唔緊要啦…我一陣要出去, 晏D先食囉…

幾驚你話執返俾我呀~~  

K先生 & CEO:

由於我每日都經常去唔同部門, 所以成日有miss call。不過通常搵我嘅都係客, 行開行埋轉頭先覆好正常。但公司有兩位同事, 習慣以全廠追蹤的方式搵人。如何追蹤? 就係當搵你唔到, 就會打俾你身邊嘅同事問你去咗邊。如果咁好彩你喺位講緊電話, 咁同佢講轉頭覆就ok。但萬一你真係行開咗…咁就所有部門都知道有同事搵你…因為佢地會逐個部門打去問….差在未問保安睇閉路電視搜括你出嚟~~