Wall E

好耐好耐未睇過一套令我又喊又笑, 帶有學習意識嘅電影. 呢套戲對白少, 主要用動作嚟表達劇情. wall-e嘅主題喺想我地去認知垃圾/廢物對地球嘅影響, 就喺因為人類製造咗大量嘅垃圾, 令到地球被人類自己嘅垃圾幅蓋, 寸草不生, 為咗清理呢個殘局, 政府就發明咗wall-e垃圾整理系統, 一個一個整理垃圾嘅智能機械人, 每日將垃圾押扁, 堆成一棟一棟嘅垃圾大廈. 而人類喺呢段時間, 就搬咗去太空暫住.  本來預計5年完成呢個垃圾整理計畫, 點知用咗700年都未完成, 因為wall-e機械人只係壞淨一個, 佢就係主角wall-e.

wall-e孤零零一個同佢嘅曱甴friend, 日復日咁執行佢嘅任務, 有感情思想嘅wall-e一直希望可以搵到自己嘅另一半. 有一日, 機會嚟喇, 一架找尋生機嘅機械人Eve嚟到地球, wall-e又驚又喜咁跟住Eve, 帶Eve返佢屋企之餘, 仲送咗之前搵到嘅一棵植物幼苗比Eve, Eve一接觸到綠色幼苗, 就進入咗植物人mode, 等總部嚟接返走. 唔知頭唔知路嘅wall-e唯有默默咁保護住Eve. 最攪笑係wall-e無啦啦帶Eve去爬艇仔, 又去睇日落, 仲鑑硬拖人哋隻手. 無耐, 總部嘅太空船就嚟到, 夾走咗Eve, wall-e拼死掹住太空船, 諗住救返Eve. 原來太空船係由住喺太空嘅人類派去地球, 一但發現生機跡象, 人類就可以返回地球. 住喺太空嘅人類, 過咗七百年後, 因為長年慮月坐喺設備完善嘅電動椅上, 體形變得肥胖, 活動能力下降, 人同人溝通都只靠電子儀器, 並無任何身體接觸, 這個正是我們現今嘅寫照.

故事後半講wall-e同Eve點樣將人類帶返地球, 當中佢哋愛情故事相當之感人. wall-e係一套非常非常好睇嘅電影, 佢嘅故事, 畫功, 音樂都喺一級水準, 仲有開場前嘅一小段攪笑動畫, 亦好精彩.

wall-e 好嘢!