世界末日？！

琴日睇討論區，有人話瑪雅文明有幾巴閉，

然後話瑪雅人推算到每5125年就係一個太陽紀，

咁呢每一個太陽紀地球上就會發生大災難，

咁之後又話之前地球經歷過四個太陽紀，今次係第五個，亦都係最後一次。

咁呢個最後一次o既太陽紀就係2012年12月23日結束，災難係乜就唔知，

但前四次分別係洪水，古代核子戰，火雨同有一個唔記得左。

跟住又有報道話，地球o既磁場正在消失，準備進行磁場逆轉，

啦，呢個就比較科學啦，咁就簡單解釋一下，

地球o既磁場，係被地核內流動o既金屬同周圍星球影響所產生，

咁家下就出現左幾個大旋渦，會將佢流動方向逆轉，磁場亦因而掉轉，

咁係掉轉前，都會減慢速度架，咁呢個MOMENT磁場就慢慢消失，直至無磁場，

咁無磁場會好大件事，例如增加患癌機會，靠磁場遷徙o既動物飛錯哂，之類。

咁又有話其實係太陽磁場掉轉搞到地球都掉埋，是但啦，總之就掉轉，

然之後又有話，有一個小行星飛緊來地球，零九年我地就會見到好似有兩個太陽咁，

好似叫乜鬼Planet X，大家有興趣就自己搵下啦，

亦有人話，家下地球已經走緊向末世，主好快番來審判世界，

接佢地番天家，或者打佢地落地獄，就睇你生平做好事多定壞事多，信唔信佢啦。

講咁多，其實都係一樣野，嘩，原來世界末日好快到啦！

有好多人都話，當每一日都係最後一日咁睇，咁你就每日都過得好精彩。

家下係真係分分鐘今日就係最後一日wo，點算好？

我就話哂氣，呢d野，睇同唔睇，無分別，係真的話，當心理準備，

反正都阻止唔到，不如過好每一天，珍惜身邊每一個人，努力去學努力去玩，

滿足自己最緊要，其實唔理上面果堆科學+神學野，呢個地球都比我地整到就快玩完架啦，

北極冰塊話2012年就熔哂咯好似（2012?!瑪雅?!莫非呢個係洪水?!XD)

咁南極個冰棚明明作用係保護D冰唔好熔，點知佢自己都開始崩塌，仲邊顧到人呀？

陸地遲早一樣無哂，唔通KEEP住游水呀？唔累架？如果變成水世界，人類一樣會被淘汰。

所以我話呢，家下大家，最緊要快D比心機比心機比心機，快D搵哂D三五知己來聚一聚啦,

就好似，我琴日做左一個抉擇，我凌晨四點係人地到溫完習，

去7-11，咁就見到某牌子o既薯片特價$10.9，

咁抵，我咪買囉，點知，佢話原來朝早七點開始做特價，家下係原價$16.5，

嘩，咁貴，我梗唔要啦，咁跟住就行去小巴站搭車，行下行下又諗到上面果堆野，

跟住就諗左一個問題：「我知佢三個鐘後價值就會降至$10.9，但我又好想食，

咁若果我等下次買，我都唔知仲有無機會會出街，咁過左之後，我咪又係一直都食唔到？」

然後7仔呢d梗有一間係左近，結果，我行左入去，買左一包當時價值$16.5 o既薯片，

到家下，雖然佢已經只係值$10.9，但係，我無後悔，仲好開心添。

呢d咪叫及時行樂囉，快樂，邊有得計架？係，你過左之後，可能會有更多更好o既野，

但亦都同時你可能就會錯過左你想要o既野，代價係更大囉。

有好多人，注重自己擁有o既有幾多，但忽略左，果堆野，佢地有完真係開心咩？

好似有d人搞生日party，咩人都叫，連d三唔識七都話一齊來啦，

結果，個生日party唔知點咁，呢到一堆玩，果到一堆嘈，分分鐘呢堆同果堆係唔妥架添，

根本唔係同一件事咁，係好似好多朋友咁，不過結論係，無個真心知己，無個係熟架囉。

係，人係要識其他人，但係生日呢d moment，

你要o既應該係快樂，同你想o既人分享快樂，而唔係一個「聯誼派對」。

最尾講明先，大家唔好話我提倡末日論，會比人當我係邪教教主捉去打靶架。XD

亦都唔係叫你去放棄所有野借一億去玩哂佢，只係提醒下你「喂，係時候珍惜下身邊人啦」

到最後，雖然我係一個極唔虔誠o既基督教徒，即係成日做埋好多壞事果D。XD

但係，都想叫下大家不如真係試下接觸下上帝，睇下佢又有無道理囉，因為我呢排又諗，

人咁精密o既結構，點能夠由進化而成呢，我當你係啦，咁其實，最原本果d野，又係點來？

我知，有人話地球經過n次大爆炸o既碎片而成，咁唔通我地又係爆出來？

即係地球其實整完之後，就好似一個好大o既泳池咁，應該係連花草樹木都無架嘛，

咁你有無見過一個泳池明明咩都無，無啦啦有條鯊魚慢慢變大游來游去，

跟住個泳池旁邊無啦啦又有隻鱷魚爬來爬去，然後再有隻牛係旁邊飲水咁呀？

你自己諗到個情景都想笑啦。跟住又咁橋，d星球距離又咁fit，太陽又o岩o岩好係果個位，

月球又o岩o岩好轉來轉去唔會撞到個地球，個地球又咁橋係圓碌碌仲要打斜轉

世上實有個神o既，如果唔係我真係理解唔到點解咁多可能性近零o既會咁橋一次過出現。

其實佛教信o既人咁多，都只係信一個本身係人o既神，即係佢唔係做我地出來架啦，

咁不如試下信聖經啦，起碼，佢聲稱人係佢做先啦，加上佢好似好強咁，真係有得諗bo。

連愛因斯坦智商一百八十都信，你點可以執輸呀？！XD

(雖然講咁多野我依然係一個唔番教會唔睇聖經，唯一為神做o既就係唔裝香o既一個基督徒。)